InfoHub Logo

رۋى — ماسقار حالبا دەيتىن ادام الدىمەن يساتاي، ماحامبەت كوتەرىلىسشىلەرى جاعىندا بولادى. سوڭىنان حانعا ساتىلىپ، ماحامبەتتى ولتىرۋشىلەردىڭ ءبىرى بولىپتى.

يساتاي ماحامبەتتىڭ جان سەرىگى بەرىش رۋىنان. ءۇبى باتىر، قاسىندا ىسىق رۋىنان ورازىمبەت دەيتىن جولداسى بار، جايىق وزەنىنىڭ سول جاعىندا جايلاۋدا وتىرعان تانا رۋىنان شىمىر دەگەن يشاننىڭ ۇيىنە ءتۇسىپ وتىرادى. شاي ءىشىلىپ، قوي سويىلىپ جاتادى. سول كەزدە يشاننىڭ قويشى بالاسى جىلاپ كەلەدى:

— جاڭا ءبىر قويىمدى ەكى اتتى كىسى يتارشىپ الىپ كەتتى، — دەيدى. سوندا يشان:

— اھ! كەشە وسى ماڭدا حالبا ءجۇر دەپ ەدى، سول بولماعاي، — دەپتى.

سول-اق ەكەن، ءۇبى اسىن قايىرىپ:

— بۇيىرسا قايتىپ كەلىپ جەرمىز، استى پىسىرە بەرىڭدەر! — دەپ تۇرا اتقا قونىپتى. ورازىمبەت بىرگە كەتىپتى.

قويدىڭ ەتىن ءپىسىرىپ وتىرعان حالبا جاقىنداعاندا، ءۇبىنى تانىپ قالىپ قاشا جونەلگەن. استىندا توقپاق جالدى تورى اتى بار ءۇبى دە ىلە قۋادى. كوپ ۇزاماي-اق قۇتىلا المايتىنىن بىلگەن حالبا ءبىر اۋىلعا قاشىپتى. اۋىلعا كەلىپ اتتان تۇسە قالعاندا، ءۇبى دە اتتان ءتۇسىپ، نايزالاپ ءولتىرىپتى.

سوڭىنان ورازىمبەت ايتىپتى:

«حالبانى شالقاسىنان ءتۇسىرىپ، ناق جۇرەكتىڭ تۇسىنان شانشىپتى. جۇرەكتەن اتىپ شىققان قاننان قوس الاقانىن تولتىرىپ الىپ ەكى-ۇش رەت ۇرتتاپ جۇتىپ جىبەرەدى. ونى كورىپ تۇرعان مەن قۇسىپ جىبەرە جازداپ قالدىم. قايتا كەلىپ شىمىر يشاننىڭ ۇيىنەن تويا ەت جەيدى. مەنىڭ جۇرەگىم ءالى اينىپ، ەتتەن شاق اۋىز ءتيدىم»، — دەپتى.

بۇل يساتاي، ماحامبەت كوتەرىلىسىنەن كەيىن حالبا حالىقتان قاشىپ، ءۇبى حان، گۋبەرناتوردان قاشىپ جۇرگەن كەزى ەكەن.

وقۋعا كەڭەس بەرەمىز:

جالبىر باتىر (ءى نۇسقا)

سىرىمنىڭ نۇرالى حاندى شابۋى (ءىى نۇسقا)

بايماعامبەت سۇلتان مەن سىرىم باتىر

---