InfoHub Logo

قۇرمەتتى ۇستازدار!

«ۇستازدىق ەتپەس جالىقپاس ۇيرەتۋدەن بالاعا» — دەگەن ۇلى اباي بابامىز. سىزدەر جاس ۇرپاقتىڭ ساناسىنا سىنالاي ەنگىزەتىن تالىم-تاربيە، ۇلگى-ونەگە ولشەۋسىز. سىزدەر — جاستاردىڭ بولاشاعىن ايقىندايسىزدار، بۇگىن ەككەن داندەرىڭىز ەرتەڭگى جەڭىستى-جەمىستى كۇننىڭ كەپىلى. ۇستاز بولاشاق ازاماتتاردى عانا ەمەس، بۇكىل بولاشاق قوعامدى قالىپتاستىرادى.

قوعام مەن ادامزات الدىنداعى ولشەۋسىز ەڭبەكتەرىڭىزدى ەسكەرە وتىرىپ، سىزدەرگە وسكەلەڭ ۇرپاق تاربيەلەۋدەگى ورەلى جۇمىستار جانە مەملەكەتتىڭ گۇلدەنۋى جولىنداعى ابىرويلى ىستەرىڭىزگە تولىمدى تابىس تىلەيمىن. قىزىعى مەن شىجىعى قاتار جۇرەتىن ۇستازدىق جولدارىڭىز تەك ورلەۋ مەن وسۋگە باستاسىن.

جانە تاعى ءبىر ايتا كەتكىم كەلەتىن جايت، مەكتەپتەردىڭ بەلسەندىلىگى. كەز-كەلگەن مەرەكە، سەنبىلىك جۇمىستارى مەكتەپتەردىڭ قاتىسۋىنسىز وتپەيتىنىن ءبارىمىز بىلەمىز. مەكتەپ ۇجىمى ءارقاشان دا قوعامدىق ءىس-شارالارعا ايانباي ات سالىسىپ، بارلىق سالادان بەلسەندىلىك تانىتادى. تاۋەلسىز قازاق ەلىنىڭ دامۋىنا قوسىپ كەلە جاتقان ەڭبەكتەرىڭىز ءۇشىن، مەن بارشاڭىزعا شەكسىز العىس بىلدىرەمىن!

قۇرمەتتى ۇستازدار! شاكىرتتەرىڭىزدىڭ قۇرمەتى مەن ماحابباتىنا بولەنىڭىزدەر. شىعارماشىلىق ىزدەنىستەر، عىلىمي جاڭالىقتارىڭىز ارتا بەرسىن. مەرەكەلەرىڭىزبەن! مەرەيلەرىڭىز ۇستەم بولسىن!

*** *** *** ***

ءقادىرلى ۇستازدار! 

مەن سىزدەردى كەلە جاتقان ءتول مەرەكەلەرىڭىزبەن قۇتتىقتايمىن! ءبىلىمنىڭ كۇشى قۇدىرەتتى. ول بار جەردە ۇزدىكسىز دامۋ ءۇردىسى جۇرەدى. ءبىلىم مەن عىلىم ارقىلى وركەنيەت دامىپ، مادەنيەت گۇلدەنەدى. ءبىلىم ارقىلى ادام بالاسى ومىردەگى ءوز ورنىن تابادى.

ۇستاز — كەلەر كۇننىڭ ۇستاسى. بالالاردىڭ قالىپتاسىپ كەلە جاتقان دۇنيەتانىمىنىڭ، ومىرگە دەگەن كوزقاراسىنىڭ يەسى. بىزدەردىڭ بۇگىنگى بولمىسىمىز الىپپەنى جاتتاتقىزىپ، قولعا قالام ۇستاتقان كەشەگى ۇستازدارىمىزدىڭ ەڭبەگى. ەندەشە، ۇرپاعىمىزدىڭ ەرتەڭ قانداي ادام بولىپ وسەتىنى — مۇعالىمدەردىڭ بۇگىنگى ەڭبەگىنىڭ جەمىسى بولماق.

«ۇلتتىڭ ۇلاعاتى — مادەنيەتتە، مادەنيەتتىڭ ۇلاعاتى — وقۋ مەن ادەبيەتتە»، — دەگەن ەكەن احمەت بايتۇرسىن ۇلى. 

ۇستاز — وسى بىلىمگە، مادەنيەت پەن ادەبيەتكە جەتەلەيتىن بىردەن ءبىر تۇلعا. ۇرپاق تاربيەسىندە ءمۇعالىمنىڭ تالانتى، بىلىكتىلىگى جانە جاۋاپكەرشىلىگى، ادامي قاسيەتتەرى وتە ماڭىزدى ءرول وينايدى، ويتكەنى ول — شاكىرت ءۇشىن اينا سياقتى. ۇستازى جاقسىنىڭ شاكىرتى ۇزدىك. بۇل — اينىماس اكسيوما. بالا ءبىلىمدى ءوز بەتىنشە كىتاپتان وقىپ تا ۇيرەنە الادى، ال ءبىراق تاربيەنى ءوز بەتىنشە الا المايدى، ونەگە مەن ۇلگى، قۇرمەت سياقتى ىزگى قاسيەتتەر — اتا-انادان قان ارقىلى دارىسا، ۇستازدان ءتالىم ارقىلى جۇعادى. 

ۇستازدار — مەملەكەت پەن قوعام اراسىنداعى التىن كوپىر تارىزدەس. مەملەكەتتىڭ يدەولوگياسى، قوعامنىڭ ءداستۇرى مەن قۇندىلىقتارى، ادامزاتتىڭ اسىل قاسيەتتەرى، عىلىم مەن ونەردىڭ مۇرالارى ۇستازدار ارقىلى ۇرپاقتان-ۇرپاققا جول تارتادى. ەرتەڭگى مەملەكەتتىڭ بولمىسى — ۇستازدىڭ بۇگىنگى تالىمىندە.