ۆيكتور ليۋستيگ — ەيفەل مۇناراسىن ساتىپ جىبەرگەن الاياق...
ۆيكتور ليۋستيگ ومىردەن وتكەن ەڭ دارىندى الاياقتاردىڭ ءبىرى سانالادى. نەبىر قۋلىق-سۇمدىقتاردى ويلاستىرىپ جۇرەتىن الاياق 45 لاقاپ اتقا يە بولعان جانە بەس ءتىلدى جەتىك مەڭگەرگەن. اقش-تىڭ وزىندە ونى 50 رەت تۇتقىنعا العان، الايدا دالەلدەنبەگەندىكتەن ءاردايىم جىبەرىپ وتىرعان. ءبىرىنشى دۇنيەجۇزىلىك سوعىسقا دەيىن ليۋستيگ ترانساتلانتيكالىق كرۋيزداردا ايلاكەرلىك لوتەرەيالار ۇيىمداستىرۋمەن اينالىسقان. 1920 جىلدارى اقش-قا كوشىپ كەتەدى دە، ەكى جىل ىشىندە بانكتەر مەن جەكە ادامداردى ون مىڭداعان دوللارعا الداپ كەتكەن.
ليۋستيگتىڭ ەڭ ۇلكەن الاياقتىعى ەيفەل مۇناراسىن ساتۋى بولعان. 1925 جىلى مامىردا شىتىرمان قۋالاپ ليۋستيگ پاريجگە كەلەدى. فرانسۋز گازەتتەرىنىڭ بىرىنەن ليۋستيگ ەيفەل مۇناراسىنىڭ ءبىرشاما ەسكىرىپ قالعانىن جانە جوندەۋ جۇمىستارىن قاجەت ەتەتىنىن وقىپ قالادى. ليۋستيگ وسىنى پايدالانىپ قالۋدى كوزدەيدى. الاياق ءوزىن پوشتا مەن تەلەگراف مينيستىرلىگى باسشىسىنىڭ ورىنباسارى ەكەنىن كورسەتەتىن وتىرىك سەنىم قاعازدارىن جاسايدى. وسىدان كەيىن ۆتورچەرمەتتىڭ التى ديلەرىنە رەسمي حاتتار جولدايدى.
ليۋستيگ ءوزى ورنالاسقان قىمبات قوناق ۇيگە بيزنەسمەندەردى شاقىرىپ، مۇنارانى جوندەۋ جۇمىستارىنا قىرۋار قارجى كەتەتىندىكتەن بيلىك ونى قۇلاتىپ، مەتاللدارىن جابىق اۋكسيوندا ساتىپ جىبەرمەك ەكەنىن ايتادى. مۇنارانى ۇناتىپ ۇلگەرگەن قوعامدى دۇرلىكتىرمەۋ ءۇشىن ليۋستيگ كاسىپكەرلەرگە بۇل مالىمەتتى قۇپيا ۇستاۋدى وتىنەدى. ءبىراز ۋاقىتتان كەيىن مۇنارانى پايدالانۋ قۇقىعىن اندرە پۋاسسونعا ساتىپ، ءبىر شابادان اقشامەن ۆەناعا قاشىپ كەتەدى. پۋاسسون كاسىبي ورتادا ءوزىن اقىماق كورسەتپەۋ ءۇشىن الدانىپ قالعانىن جاسىرىپ قالادى.
وسىنىڭ ارقاسىندا ءبىراز ۋاقىتتان كەيىن ليۋستيگ پاريجگە قايتا ورالىپ، بۇرىنعى تاسىلمەن مۇنارانى تاعى ساتىپ جىبەرەدى. الايدا بۇل جولى ونىڭ جولى بولمايدى، سەبەبى الدانعان بيزنەسمەن پوليسياعا شاعىم تۇسىرەدى. ليۋستيگ شۇعىل اقش-قا قاشىپ كەتەدى. 1935 جىلى جەلتوقساندا ليۋستيگ تۇتقىنعا الىنىپ، سوتتالادى. دوللارلاردى قولدان جاساعانى ءۇشىن ول 15 جىلعا، سونىمەن قاتار ۇكىم شىققانعا ءبىر اي قالعاندا باسقا تۇرمەدەن قاشىپ كەتكەندىگى ءۇشىن 5 جىلعا سوتتالادى. ول سان-فرانسيسكونىڭ ماڭىنداعى تانىمال الكاتراس تۇرمەسىندە پنيەۆمونيادان 1947 جىلى قايتىس بولادى.
You Might Also Like
