InfoHub Logo

Sýyq jaqtan jyly jaqqa teńiz ústinde aqqýlar tobymen ushyp bara jatty. Olar kún demeı, tún demeı ushty, kelesi túnde de toqtamaı ushty. Jaryq aı ústinde kókke malynǵan teńiz sýyn kórdi. Aqqýlardyń qanaty talyp, zoryǵyp sharshaıdy; sóıtse de toqtamaı ushady. Tabyn basynda ákki aqqýlar, olardyń artynda áli jas, qanaty qataımaǵan aqqýlar ushty. Bir jas aqqý tizbektiń sońynda qalyp, kúshi taýsyldy. Ol qanatyn sermegenmen ármen ushýǵa kúshi jetpedi. Sonda ol qanatyn jaıyp, sýǵa qaraı quldılaı jóneldi, al basqa aqqýlar ármen qaraı usha berdi. Aqqý qanatyn jıyp aldy da, sýǵa qondy, teńiz aqqýdy shaıqap, qaqpaqyldaı bastady.

Aqqýlar toby bul kezde aspanda kórinbedi, tek aqqý qanattarynyń soǵysy alystan áreń estildi. Olar múldem kózden tasa bolǵanda jalǵyz qalǵan aqqý moınyn artyna, keýdesine buryp, kózin jumdy. Ol teńiz ústinde qozǵalmaı jatty, tolqyn ony birese joǵary, birese tómen qaqpaqyldap, qalqytyp bara jatty.

Tańsáride teńiz ústinde samal jel oınap, aqqýdyń keýdesine sý shapshydy. Aqqý kózin ashty. Juldyzdar kók aspanda aǵaryp, shyǵystan kún sáýlesi atyp kele jatty. Aqqý demin ishke tartyp, moınyn kerip, qanatymen sýdy sabalap, kókke sermeı bastady. Ol birtindep joǵary kóterile berdi, bıikke samǵady, aıqaılap jatqan qara tolqyn ústinde jalǵyz aqqý ushyp bara jatty.

Aýdarǵan Salaýat Kárim

---