InfoHub Logo

London qalasynda turǵyndarǵa jyrtqysh ańdardy kórsetip, aqshalaı, bolmasa kórgenderi úshin haıýandardyń jemine dep ıt, mysyq degenderdi ala beredi eken. Bir kisi jyrtqyshtardy kóreıinshi dep kóshede ıesiz qalǵan kúshikti ustap alyp, haıýanattar parkine kelipti. Álgi adamǵa jyrtqyshtardy kórýge ruqsat etip, alyp kelgen kúshikti arystan turǵan torǵa laqtyrady. Kúshik tor ishine kirgen boıda quıryǵyn butyna qysyp, buryshqa tyǵyla bastaıdy. Arystan kúshikti ıiskelese, kúshik arqasyna jatyp, aýnaqshyp, tabanyn joǵary kóterip, quıryǵyn bulǵańdatady. Arystan kúshikti aıaqtarymen aýnatyp oınasa záresi qashqan kúshik arystan aldynda qurdaı jorǵalaıdy. Arystan kúshikti aıap, basyn shaıqap, budan keıin tıispeıdi.

Parktiń qojasy arystanǵa tor ishine et laqtyrsa, arystan kesek etten julyp kúshikke beredi. Túnde arystan uıqyǵa ketkende kúshik onyń janyna kelip arystan tabandarynyń ústine basyn salyp uıyqtaıdy eken. Sodan beri kúshik tor ishinde arystanmen turady, arystan kúshikke tıispeıdi, birge tamaq ishedi, uıyqtaıdy, arystan anda-sanda kúshikpen oınap qoıady.

Bir kúni kúshiktiń qojasy tabylyp, kúshigin tanyp, qaıtarýdy suraıdy. Haıýanattar parkiniń qojasy kúshikti qaıtarǵysy kelip, kúshikti shaqyrsa arystan yryldap kúshikti bermeı qoıypty.

Arystan men kúshik tor ishinde bir jyl turady. Biraz ýaqyttan keıin kúshik aýyryp, ólip qalady.

Arystan kúshiktiń ólip qalǵanyn kórip, tor ishinde qarǵyp sekirip, jekirip, quıyryǵymen ózin sabap, tor jıegi men edendi mújı bastaıdy. Bir kún boıy tor ishinde ókiredi, sodan keıin óli kúshiktiń qasyna jatyp tynyshtalady. Park qojaıyny ólgen kúshikti tordan almaq bolǵanmen, arystan bermeıdi, arystanǵa basqa ıtti aýystyrsam múmkin arystan umytar dep basqa tiri kúshikti torǵa laqtyrady, arystan álgi kúshikti sol boıda talap tastaıdy. Arystan ólgen kúshikti tabanymen qushaqtap bes kún jatady, altynshy kúni arystan ózi de ólip qalypty.

Aýdarǵan Salaýat Kárim

---