InfoHub Logo

- Bala tárbıesi degen qıyn eken, - dedi erkek. - Óz basymnan ótkesin bilemin ǵoı. Jalǵyz qyzymyz bar. Sonyń tárbıesine alańdaımyz. Keıingi kezde qyzymyz bizge qarsy sóıleıtindi shyǵaryp júr. Ol tipti bizdiń ózimizdi teriske shyǵara bastady. Mysaly, jubaıymyz ekeýmiz áńgimelesip otyrsaq, ol aralasa ketip, bizdi teriske shyǵarady.
- Sen bizge qarsy sóılep otyrsyń ǵoı, - deımiz biz.
- Men qarsy sóılep otyrǵan joqpyn, - deıdi qyzym. - Bar bolǵany óz pikirimdi bildirgenime de jazyqtymyn ba?
- Qarsy sóılemegeniń osy bolsa... Sen áli de sóılep otyrsyń.
Áıelimiz ekeýmiz qatar otyryp alyp, onyń tárbıesi jaıly shúńkildese bastaımyz.
- Osynyń bári mektepten, - deıdi áıelim.
- Durys aıtasyń, árıne mektepten.
- Olardyń dırektorlary ne bitiredi eken sonda?
- Qaıdaǵy dırektor? - deımin men. - Dırektor degen bar bolǵany galstýgin tartqylap qoıyp, eki qolyn artyna ustap júredi de qoıady.
- Mundaı jumys seniń de qolyńnan keledi ǵoı, - deıdi áıelim.
- Kelmegende she? Galstýgińdi tartqylap qoıyp, qolyńdy artyńa ustap júrý de qıyn jumys bolyp pa? Tek tamaq ishýdi umytyp ketpeseń bolǵany.
- Olardyń mektebi qaı jerde ózi? - deımin. - Sen onda barsańshy, sóıt te shańyn qaq.
- Qaǵamyn, - deıdi áıelim.
Áıelim erteńińe mektepke ketti. Biraq shańyn qaǵa almapty. Anyǵynda onda biz oılaǵandaı dırektor erkek emes, áıel adam eken.
Dırektor áıelimdi jyly iltıpatpen qabyldapty.
- Biz sizderge qalaı alǵysymyzdy bildirerimizdi bilmeı otyr edik, - deıdi dırektor. - Sizderdiń qyzdaryńyz bizdiń mektebimizdiń eń úzdik shákirti. Osyndaı bala tárbıelep otyrǵandaryńyz úshin sizderge raqmet!
Áıelim bul sózderden keıin ne aıtaryn bilmeı tosylyp qalady.
- Sonda da bir aýyz eskerte salsańyzdar qaıtedi.
- Biz sizderge alǵysymyzdy bildirip, hat jiberip edik qoı, - deıdi dırektor tańdanyp. - Sizder almadyńyzdar ma?!
- Qaıdaǵy hat?! - deımin men áıelime qarap. - Sen hat kórip pe ediń?
- Hat kórsem, kózim shyqsyn.
Biz dereý qyzymyzdy shaqyryp alamyz.
- Osynda bizge alǵys bildirip, hat kelgendigin estip otyrmyz?
Qyzym bizge qaǵazdarynyń arasynan hatty alyp berdi.
- Bul hat bizge arnalǵan ǵoı. Sen muny neǵyp bizge bermeı júrsiń?
- Men senderge hat ákeldim dep qansha ret aıttym, - deıdi qyzym kúıinip. - Sender keshegi bolǵan toıdyń áńgimesinen aýyzdaryń bir bosamaı otyryp aldy emes pe?
- Mynaý bizge qarsy sóılep tur ǵoı.
- Men qarsy sóılep turǵan joqpyn, - deıdi qyzym. - Bar bolǵany túsindirmek boldym.
- Bul hatqa jaýap jazý kerek pe? - deımin áıelime qarap.
- Qaıdan bileıin? Mádenıetti adamdar hatqa jaýap qaıtaryp jatady ǵoı.
Biraq qyzymyz bizdiń hatymyzdy aparýdan úzildi-kesildi bas tartty. Tipti bólmesiniń esigin tars jaýyp aldy.
- Aıtpaqshy álgi sońǵy qońyraý degen birdeńeleri bolady emes pe? - deımin áıelime qarap. - Hatty sonda aparyp bereıik.
Biz dereý qyzymyzdy shaqyryp aldyq.
- Senderdiń sońǵy qońyraýlaryń qashan bolatyn edi?
Qyzymnyń kózi sharasynan shyǵa jazdady.
- Qaıdaǵy sońǵy qońyraý?! Men áli jetinshide oqyp júr emespin be?!
- Endi soǵan da biz kinálimiz be?
Qaıtkende de hatty sońǵy qońyraýda aparyp beretin bolyp sheshtik. Ári alǵysymyzdy bildireıik, ári jón-jobany biletindigimizdi tanytyp, syı-sıapat ta kórseteıik.
- Sońǵy qońyraýǵa deıin áli biraz ýaqyt bar eken, - dedi erkek qol saǵatyna bir qarap qoıyp. - Oǵan deıin bala tárbıesimen úzdiksiz aınalysa bermekpiz.
 

---