InfoHub Logo

Avtory:
Ǵabıden QOJAHMET,
Qyzylorda qalasy

Besiginde sábı jatyr bulqynyp

Bolý úshin kúni erteń de ulty nyq,
Tanı bilsin, besiginen jurty uǵyp.
Ana - áýenge qosyp birge ýilin,
Tal besikte sábı jatyr bulqynyp.

"Kóz tımesin, kórkemin - aı, kórkemin!"
Deıdi - daǵy erkeletip tentegin.
Ana - júrek baýrap ony ánimen,
Arman eter óz ulynyń erteńin:

"İsterimen tym alysqa baratyn,
Ár isinde juldyz bolyp janatyn.
Dıdary men symbatyna kórgen jurt
Ah urysyp, tańdaı qaǵyp qalatyn.
Erligimen qyz júregin órtetken,
Sert berse eger, semserdeı bop sert etken.
Myna álemniń hanzadasy sekildi,
Túse qalǵan sıaqty ańyz, ertekten.
Ana - áldımen terbetilgen besikte
Dál osyndaı ul jatpasyn kim bilgen!

Halqyn súıer ulan etip jaratqan,
Kende etpegen elin as pen tamaqtan.
Baı - baǵlandy kózine bir ilmegen
Nazymdaıyn qyzdy ózine qaratqan.
Bar tilegi eli jaıly oılanǵan,
Qanjyǵasy tek sol úshin maılanǵan.
Ash bolsa eli, jigit - júrek ýaıymdap,
Toq bolsa eli, kóńili sonda jaılanǵan.
Ana - áldımen nurlanǵan bul besikte
Qambar syndy ul jatpasyn kim bilgen!

Kek kernese, naızaǵaı bop sermelgen,
Ár qımyly qandaı ǵana erden kem?!
Qamshydaı qahary bar qarýdyń
Alýan syryn at ústinde meńgergen.
Aq peıilin asha bilgen dosqa san,
Laıyq dep qosta sony, qostasań.
Kúshtilerdi óz ornyna qoıǵyzyp,
Álsizderdi basynbaǵan eshqashan.
Namystary ór bop kókke samǵaǵan,
Eki sóıleý qanynda eshbir bolmaǵan.
İriligi minezinen tanylyp,
Búlingennen búldirgi eshbir almaǵan.
Sar dalany kúńirentip án salǵan,
Ánderine tyńdaýshysy tamsanǵan.
Ónerde de ozyq týǵan jigitti
Alaqanǵa salyp eli qarsy alǵan.
Ondaı uldar kúnde týa bere me,
Mádı syndy, Imanjúsip sekildi
Bul besikte ul jatpasyn kim bilgen!

Sol kezde - aq jurt ult kósemi sanaǵan,
Ultqa laıyq eldik qurý qalaǵan.
Halqy úshin qyzmetti ózine
Ǵumyrlyq bir paryzym dep sanaǵan.
Armandary el - jurtym dep kóktegen,
Muń teńizin óz basy úshin shekpegen.
Alashynyń oqyǵany sanaly
"Áleke" dep, aldyn kesip ótpegen.
Kókiregi bilimmenen nurlanǵan,
Muńdansa da, ult qamy úshin muńdanǵan.
Tirliginde qylǵan árbir isinen
Urpaǵyna ańyz bolyp, syr qalǵan.
Týatuǵyn óz ultynyń baǵyna,
Asyǵatyn ultpen birge tańyna.
"Áı, qap!" desip júretuǵyn jurtynyń
Jalaý bolar kúni erteń - aq janyna.
Ana - áldımen nurlanǵan bul besikte
Álıhandaı ul jatpasyn kim bilgen!"

Besiginde - aq bala - úmit, bala - baq,
Ana - arman júr oı teńizin jaǵalap.
Saqtaý úshin jat kózderdiń suǵynan,
Mundaı ulan, ana, sizge amanat!

Qylyǵymen bolashaqqa umtylyp,
Kútetuǵyn erteńinen ulty úmit.
Anasynyń armanynan qýat ap:
"Alpamystaı aǵamsha tez óssem!.." dep,
Sony arman ǵyp, sábı jatyr bulqynyp.