InfoHub Logo

Men Almatyǵa «Qazaqstan pıoneri» gazetine redaktor bolyp keldim. Kelgim kelmedi: buryn gazet-jýrnal redaksıasynda basshy qyzmette bolmaǵasyn, júreksindim, ári aýyl-el shalǵaı - Gýrev qaıda, Almaty qaıda?! - anam bolsa, jasy kelgen adam, Aıbar kishkentaı, áıteýir ne kerek, jalǵyz ózim shirigen jumyrtqadaı sezinip, astanaǵa keldim. Bar tanıtynym - «Lenınshil jas» gazetiniń ujymy. Eń aldymen ózim menshikti tilshisi bolyp isteıtin «Lenınshil jastyń» jańadan kelgen redaktory, ıaǵnı ózimniń bastyǵym Seıdahmet aǵaǵa (Berdiqulov) sálem berdim. «Seni Qazaqstan pıonerine» redaktor bolsa degen usynys bar», - dep, aǵaı ózi buryn basshylyq etken pıoner gazetiniń qyzmetkerlerimen syrttaı tanystyrdy. «Almatydan adam tabylmaǵandaı, túý Gýrevten ákelýlerine qaraǵanda, respýblıka basshylarynyń bireýiniń birdeńesi boldy ǵoı shamasy», - dep, tosyrqaǵandar da kezdesti. Qazaqstan LKSM Ortalyq Komıtetiniń birinshi hatshysy Ózbekáli Jánibekov pen ıdeologıalyq hatshy Keńes Aýhadıev - ekeýi de óte jyly nıetpen qarsy aldy.

- Seniń «Lenınshil jastyń» batys oblystardaǵy menshikti tilshisi qyzmetinde júrip jazǵan maqala, ocherkteriń, kótergen máseleleriń bizdi de oılandyrdy. Respýblıkanyń pıoner, komsomol baspasózinde basshy qyzdar joq, sondyqtan ózińdi usynyp otyrmyz, - desti.

Sonymen, astanadaǵy ómir bastaldy. Jańa ortanyń psıhologıalyq salmaǵy jeńil emes eken. «Lenınshil jastyń» tilshisi bola júrip, biraz óleńder jazǵam, olar respýblıkalyq «Jalyn», «Juldyz» jýrnaldarynda basyldy. «Mazasyz shaq» degen óleńder jınaǵymdy «Jazýshy» baspasyna tapsyrdym. Bir kúni Aqushtap (Baqtygereeva) kelip:

- Seniń kitabyńnyń redaksıalyq talqylaýy bolatyn kórinedi, soǵan kelsin dep jatyr, - dedi. Ekeýmiz bardyq. Baspanyń poezıa bóliminiń meńgerýshisi Qadyr Myrzalıev te, meniń kitabymnyń redaktory Saǵı Jıenbaev eken.

Meniń redaksıalyq keńes, talqylaý degenniń ne ekeninen habarym joq. Ol kezde «Jazýshy» baspasy Komýnıstik prospektisiniń boıynda, Qazaqstan Jazýshylar odaǵy úıiniń birinshi qabatynda bolatyn. Meniń kitabymdy talqylaý bastaldy. Marqum Shámil Muqamedjanov, Ǵafý aǵamyz keldi. Bir kezde esikti aıqara ashyp, eńgezerdeı, qyzyl shyraıly jigit kirip keldi. Buǵan deıin kórgen emespin, biraq tanı qoıdym - Muqaǵalı Maqataev. «Juldyz» jýrnalynda qyzmet isteıdi dep Aqushtaptan estigem. «Qarlyǵashym, keldiń be?» kitaby arqyly syrttaı jaqsy kóretinmin. Otyrdy. Jurt sóılep jatyr. Saǵı aǵamyz:

- Farızanyń óleńderi tym anaıy, oı, sezimin tym ashyq aıtady, al bul shyǵys áıeline jat qylyq. Mysaly:

«Adam degen baqyttan tunshyǵady, á –

shyryn sátte boıynda qan tasyǵan.

Bizder jaqqa qaraýǵa qymsyna ma –

Aı jatyr shalqasynan», -

deıdi. Iaǵnı, Aıdyń qymsynýyna qaraǵanda, lırıkalyq eki keıipker kisi qyzyǵarlyq is istep otyrmaǵan bolý kerek, - dep, taǵy kóp-kóp mysal keltirdi. Bir kezde Muqaǵalı ornynan atyp turyp:

- Áı, Qadyr! Saǵı! Myna qyz (buryshta adamdardyń arasyna túsken taǵy mysyqtaı búrisip otyrǵan meni suq saýsaǵymen shuqshıa nusqady) kúni erteń senderdi uryp ketedi (shamasy, «jer soqtyrady» dep turǵany-aý dep uqtym). Betiń qursyn, kápir! - degeni! Súıtti de: - Áýeli osy qyzdaı óleń jazyp alyńdar! - dep esikti tars jaýyp shyǵyp ketti. Ne jylarymdy, ne kúlerimdi bilmeı, betiń qursyn degeni nesi dep alasapyran oılarmen men otyrmyn. Aqushtap:

- Sen kóńilińe alma - onyń jaqsy kórgeni solaı, «súıgen qulyn shunaǵym deıdiniń» keri ǵoı, - dep sybyrlady.

Meniń Muqaǵalı aqynmen alǵashqy kezdesýim edi bul.

---