InfoHub Logo

Jırenshe sheshen qartaıyp, Qarashash sulý ólip, toqal alyp, bala taýyp, balalary er jetip, shaıpań bolyp, toqaly tentek bolyp syılamaı qadiri ketip, onyń ústine han qasynan da qalǵan soń buzaý baǵyp, tezek terip, kúneltip júredi. Áz Jánibek han Jırensheni saǵynyp, jaı-kúıin kórip bilýge joldas ertip sheshenniń úıine keledi. Úı syrtyna kelip:

— Sheshenim qaıda? Mal-jan aman ba? — degende, qatyny shyǵyp:

— Sheshendi qadirlep izdep kelip turǵan kim ózi? Sheshendi izdeseń, dalada tezek terip júr, — depti. Sonan soń han Jırenshege dalada izdep jolyǵyp, «sheshenim, kóriseıik» dep attan túsip, amandasady.

— Bul tezek tergeniń qalaı? — dep suraıdy. Sonda Jırensheniń aıtqany:

— Qadirlep kelgen hanym-aı,
Keýdemde shybyn janym-aı!
Bir ózińnen basqa jan
Halimdi bilip tanymaı,
Aýzymnan shyqqan sózderim
Jeýge jeńsik sary maı.
Qostaýshym joqtan qunsyz bop,
Sózime daýa darymaı,
Zerimdi satar zerger joq,
İshtegi shyqsyn zarym-aı!
Bes kemshilik bir basta,
Júremin neǵyp arymaı.
Qadirim ketip, qartaıyp,
Baǵym ketip mal taıyp,
Eshnársege jarymaı.
Syılaıtuǵyn óziń joq,
Burynǵy buldy sózim joq,
Qaıteıin búıtip qarymaı.
Qatyn tentek, ul shaıpaý,
Ekeýledi, aı, hanym!
Kárilik jeńdi, mal taıdy
Tórteýledi, aı, hanym!
Sonymen baqtan taıǵanym,
Arqamdaǵy mynaý tezek
Sheshenge kelgen bir kesek, —

depti. Sonan soń han Jırensheni qaıtadan óz qasyna alyp, ýázir etken eken.

---