InfoHub Logo

Baıaǵyda bir etikshi bolypty. Aqshadan jurdaı bolsa kerek. Aqyrynda ábden kedeılenip bitip, qos etik tigerlikteı ǵana bylǵarysy qalypty. İńirde álgi bylǵarydan etik pishedi de:

«Qazir jatyp, uıqymdy qandyraıyn, tańerteń erterek turyp, tigip tastarmyn»,— dep oılaıdy.

Sóıtedi de, jatyp uıqtap qalady. Tań sáriden oıanyp, beti-qolyn jýyp, jumysqa kirispekshi bolyp yńǵaılansa, jumysy daıyn tur — etikterdi bireý tigip qoıypty.

Etikshi óz kózine sener-senbesin bile almaı, ań-tań qalady. Muny nege jorýyn da bilmeıdi.

Etikti qolyna ustap, aýdaryp-tóńkerip qaraı bastaıdy.

Qalaı minsiz tigilgen deseńshi! Tigisinde bir aqaý joq. Asqan ismer adamnyń qolynan shyqqany kórinip tur. Kóp kúttirmeı satyp alýshysy da tabyldy. Etikke qyzyǵyp, kóp aqsha tólep, satyp áketedi. Etikshi endi eki qos etik tigetindeı bylǵary satyp alady. İńirde eki qos etikti pishedi de:

«Qazir jatyp, kóz shyrymyn alaıyn, tańerteń erterek turyp, tigip tastarmyn»,— dep oılaıdy.

Tań sáriden turyp, beti-qolyn jýyp, jumys orny jaqqa qarasa, eki qos etiktiń ekeýi de tigýli daıyn tur.

Satyp alýshylar bul joly da tez tabylady. Etikterge qatty qyzyǵyp, kóp aqsha tóleıdi. Etikshi endi baqandaı tórt qos etik tigetindeı bylǵary satyp alady.

Kelesi kúni tańerteń tórt qos etik te tigilip daıyn tursa kerek.

Sóıtip, sodan beri kún saıyn osylaı qaıtalana beredi. İńirde pishilgen etik tańerteń tigilip daıyn turady.

Etikshiniń tapshylyq, joqshylyq ómiri umyt bola bastaıdy.

Bir kúni ińirde kúndegideı birneshe etik piship qoıady da, uıyqtar aldynda áıeline:

— Báıbishe, búgin úıqtamasaq qaıtedi, etikti tigip júrgen kim eken, kórsek qaıtedi,— deıdi.

Bul sózge áıeli qýanyp:

— Maqul, uıqtamasaq, uıyqtamaıyq, kóreıik kim ekenin,— deıdi. Ústel ústine shyraq jaǵyp qoıyp, buryshta ilingen kıimderdiń artyna baryp tyǵylyp, kútip otyra beredi. Bir ýaqytta, dál tún ortasy bolǵanda, úıge kishkentaı kisiler kelip kiredi. Etikshiniń ústeline shyǵyp otyra qalyp, kip-kishkentaı saýsaqtarymen pishilgen bylǵaryny alyp, tige bastaıdy.

Bizdi shanyshqanyna, taramysty ótkizgenine, balǵany tyqyldatqanyna kóz ilespeıdi eken, etikshi tańyrqap, kishkentaı kisilerden kópke deıin kózin taıdyra almaıdy. Bar etikti tigip bolǵansha, analar bir tynym almaıdy. Sońǵy etik daıyn bolysymen, ústelden sekirip-sekirip túsedi de, kózden ǵaıyp bolady.

Tańerteń áıeli kúıeýine:

— Bul kishkentaı kisiler qolymyzdy baılyqqa jetkizdi. Biz de bularǵa bir jaqsylyq jasaýymyz kerek qoı. Kishkentaı kisiler bizdikine ylǵı túnde keledi, ústerinde kıimi joq, sirá, tońatyn shyǵar. Meniń basyma mynadaı bir oı kelip otyr: men árqaısysyna kóılek,kúrte, shalbar tigip qoıaıyn, al sen etik tik,— deıdi.

Etikshi áıeliniń sózin tyńdap bolyp:

— Oıyń jaqsy eken. Shirkinder, sirá, bir qýanyp qalar!—deıdi.

Sóıtip, bir kúni keshke syılyqtaryn pishilgen bylǵarymen birge ústelge qoıyp, ózderi taǵy da buryshqa tyǵylyp, kishkentaı kisilerdiń kelýin tosyp otyra beredi.

Burynǵydaı, dál tún ortasy bolǵanda, úıge kishkentaı kisiler kiredi. Ústelge sekirip shyǵyp, iske kirispek bolsa, pishilgen bylǵarymen birge ádemi kóılek, kúrte jatyr, qasynda kip-kishkentaı etik tur.

Kishkentaı kisiler á degende abyrjyp, aýzyn ashyp qalsa da, sońynan qýanyp máz bolady.

Ádemi kıimderdi tez-tez kıip alyp, bı bılep, óleń aıta bastaıdy:

Sándi kıim munsha kóp, Kıindik te keneldik! Etik tiger mursha joq, Qyzyqqa endi bólendik!

Ústelden ústelge, oryndyqtan oryndyqqa sekirip, kishkentaı kisiler uzaq ýaqyt óleń aıtyp, bı bıleıdi. Sonsoń bir kezde ǵaıyp bolady, qaıtyp etik tigýge kelmeı qoıady. Biraq baqyt pen sáttilik uzaq ómirinde etikshiden eki eli aırylma.

---