InfoHub Logo

Qazaly aýdanyndaǵy №25 mektepke uzaq jyldar basshylyq jasaǵan Qazaqstan Respýblıkasy bilim berý isiniń úzdigi Almas Temirbaıuly jýyrda ǵana 63 jasqa tolyp, qurmetti demalysyna shyqqan edi. Mektep ákimshiliginiń usynysymen osy is-sharanyń senarıine baılanysty jumystardy jazyp otyrǵanda, osy bir shaǵyn estelik te til ushyna oralyp turdy.

Qyzylordanyń oqý ornynan ádebıettiń muǵalimdigi mamandyǵy boıynsha bitirip kelgen buǵan mekteptiń dırektory: "Kel, jumysqa alaıyn", - dedi. Munysy jaǵdaıǵa qaraǵany, túsinistik tanytqany, úıden apasynyń janynan shyǵyp tursyn degeni, dúnıeden ozyp ketken kókesine degen qurmeti. Áıtpese mektep sol sátte dál osy mamandyqtyń ıesine tym zárý bolyp turǵan joq edi. Muny estigen apasy: "Bul bala da kórgendigin istep otyrǵan bala ǵoı", - dedi.

Biraq máseleni mekteptiń dırektory sheshpeıtin bolyp shyqty. Máseleni aýdandyq bilim bólimi sheshedi eken. Al aýdandyq bilim bólimi muny mamany tapshy shalǵaı aýyldarǵa jiberip jatty. Osylaı aýdandyq bilim bólimi men aýyldyń arasyn tamyzdyń on besinen qyrkúıektiń basyna deıin jol qylyp júripti.

Bir kúni aýdandyq bilim bóliminen mekteptiń dırektoryn kórip qaldy.

- Seni aýylǵa jibergen joq pa? - dedi mekteptiń dırektory buǵan.

- Joq, jibergen joq.

- Bastyqqa men kirip aıtyp kóreıin be?

- Aıtyp kórińiz.

"Sózińdi bireý sóılese..." degen bar ǵoı. Bolmasa mekteptiń dırektory da týǵany emes, týysqany emes, rýlasy emes.

Osy mekteptiń dırektoryn da jurt "Bul da bir qasqyr jigit qoı" deıtin. Sol "qasqyr jigitińiz" sonda kádimgideı qobaljyp turdy. Dırektordyń boıy uzyn jigit ekendigin endi ǵana baıqaǵandaı bolypty. ZavRaıONO-nyń qabyldaý bólmesindegi turǵan aınaǵa tizesin sál-pál búgip qarady. Salaly saýsaqtarymen shashyn taraǵyshtady. Sonan soń taraǵyn sýyrdy. Sosyn hatshy qyzǵa qarap gúr etti:

- Qalaı, bári durys pa?

Hatshy qyz jymıdy:

- Durys, aǵaı.

Dırektor dál sol sátte ne sýdyń tereńine súńgigeli turǵan, ne qalyń órttiń qushaǵyna kirip ketkeli turǵan adam sekildi edi. ZavRaıONO-nyń kabınetiniń jymdasyp jabylǵan esigi sýyq qabaq tanytyp, syzdanyp turdy. Dırektor sol esikti ashty da, ishke súńgip ketti. Syrtta tileýin tilep bul qaldy. Biraq dırektordyń ile-shala atyp shyqqany:

- Oıbaı, myna kisi degen bet qaratpaı otyr ǵoı!

"Maǵan eshkim eshkimniń sharýasymen kirmesin! Núkte!" Bul - zavRaıONO-nyń aıtqany.

Sharýasy bitpeı qalsa da, mektep dırektorynyń ózi úshin bastyqtyń aldyna kirip jatqandyǵyna sol joly razy bolyp turypty. Qatań minezdi basshynyń qabaǵynan ózi seskenip tursa da, jas mamandy ózine surap alǵysy kelip júrgen áreketi kóz aldyna kelse, áli kúngi jyly jymıady.

Birde osy joldardyń avtory mekteptiń dırektorymen birge sol kezdegi 102-ni basqaryp otyrǵan Shyntas Jádıulynyń kabınetinde otyrǵanda, Shákeń buǵan: "Biz, bergi bettiń dırektorlary, Almasty "Bergi bettiń zavraıonosy" dep aıtamyz" degeni bar-dy janynda otyrǵan qurdasyna kóz qıyǵyn bir tastap qoıyp, qaljyń qashyrta sóılep. Sol "Bergi bettiń zavraıonosy" degen beıresmı ataǵy bar dırektor 63 jasqa tolyp, qurmetti demalysyna shyǵyp jatyr eken. Osy mereıtoı sátinde ustazdary, ujymy, shákirtteriniń ata-analary: "Uzaq jyl basqaryp otyrǵan mektebińizdiń nómiri 25 eken, endeshe, qurmetti demalysyńyzda da 25-tegi jigitteı bolyp júre berińiz!" degen tilek aıtady.

Oqý jyly tabyspenen ótse dep,
Jetistikter aldan úzdik jetse dep.
Jınalysty basqaratyn dırektor,
Ustaz úshin onyń aty - pedsovet.

Jınalyp ustaz, kelse ýaqyt yńǵaıǵa,
Demeıdi, ras, japqysh qaıda, gúl qaıda.
Bastalsyn ba, dep suraıtyn, pedsovet,
Bastalmasyn deıtin kim bar mundaıda.

Áı, sonan soń jaıyp tastap qanatyn,
Ustazdaryn qadap-qadap alatyn.
Kemshilikter nege ilesip júr áli,
Nege jumys bolmaı jatyr bolatyn?!

Tártip kerek, jarat, meıli, jaratpa,
Nege oqýshy qatyspaı júr sabaqqa.
Ata-anadan suradyń ba sol jaıly,
Sony búgin shesh, erteńge qaratpa.

Sendirip aıt, sózderińe senbese,
Kóndirip aıt, aıtqanyńa kónbese.
Bolmasa erteń shaqyryp kel ózime,
Ózderińniń áliń eger kelmese.

Deıdi ujymǵa: bolmaıdy odan baǵań kem,
Ómir degen ótý emes alańmen.
Jumys isteı bilý kerek árqashan,
Til tabysa bilý kerek adammen.

Syzylsa da jetistikter syzyǵy,
Deı almaımyz bar mektepten biz uly.
Degen sátte tym-tyrys bop ujymy,
Tek shybynnyń estiletin yzyńy.

Mektebi úshin shákirti úlken úmit-ti,
Osy jolda ustaz soǵan birikti.
Sol ustazdyń, mine, búgin basshysy
63-tiń asqaryna shyǵypty.

Ótken iste jetistikter bar eken,
"Úzdik" degen soǵan bergen baǵa eken.
Temirbaev dese ony resmı,
Bolǵan talaı syılasqanǵa "Alekeń".

Shákirtterdiń bilim jol ǵoı armany,
Al bilimniń kóp bilgenge salmaǵy.
Ár ustazdy dese eger jaýynger,
Ár dırektor onda onyń sardary.

Ár shákirttiń bolsa ómirde talaby,
Mektep sonyń eń alǵashqy qadamy.
63-tiń dál búgingi toıy da
Mektebiniń toıy da eken baǵaly.

Ushyryp sap talaı ul men qyzyńdy,
31 jyl basqarypty ujymdy.
63-tiń asqaryna shyǵypty,
Artqa tastap sonsha kóktem, kúzińdi.

Ótsin dep toı shattyqty ánge bólete,
Deıdi ujymy kelsin baq pen bereke.
Deıdi taǵy: "63-tegi toıyńyz
Jalǵastyǵyn taba bersin, Aleke!"
 

---