InfoHub Logo

Taraz qalasy, Erekshe daryndy balalarǵa arnalǵan «Daryn» mektep-ınternaty
Saǵyndyq Qaraqat Baýyrjanqyzy
Jetekshisi: Seıtjanova Gýlafrez Bahıtovna

 

Maǵan jaqsy muǵalim bárinen de qymbat, óıtkeni muǵalim – mekteptiń júregi.
                                                                                                                   Ybyraı Altynsarın

«Ustaz - uly esim» - deıdi Muhtar Áýezov. Iá, rasynda da, «ustaz» degen sózdiń astarynda mán-maǵynanyń bári bar, bári de bar: bilim men ǵylym, mahabbat pen súıispenshilik, meıirimdilik pen meıirbandyq, talapshyldyq pen týrashyldyq... Árbir balanyń tulǵa bolyp qalyptasýyna, dúnıedegi árbir mamandyq ıesiniń bolashaqqa qanattanýyna sebepker bolatyn janashyr, izdenimpaz adam – uly ustazymyz. Meniń oıymsha, ár shákirttiń janyna jaqyn keletin, eń súıiktisine aınalatyn, ómirlik ustanymdarynyń jarshysyna aınalatyn  ustazy bolady. Meniń de súıikti ustazym bar. Ol kisiniń  ǵıbrat alar árbir sózi, keskin-kelbeti, bári-bári men úshin – úlgi-ónege. «Adamnyń adamshyldyǵy jaqsy ustazdan» dep Abaı hákim aıtpaqshy, ustazymdy eń alǵash ret kórip-bilgennen bastap, ol kisige degen qurmetim, sabaqqa degen zeıinim artty.  

Men tórt mezgildiń ishinde tek jaz mezgilin qatty jaqsy kóretin edim. Kúz kelgende, jarqyraǵannyń bári qýaratyndaı, jaınaǵannyń bári tumandanatyndaı bolyp kórinetin. Al, bıylǵy kúz meniń ómirimde aıtarlyqtaı keremet oryn aldy. Bul kúz men pir tutatyn bir kisimen qaýyshtyrdy. Alǵash «Daryn» mektebine aýysarda, qabyldanǵanymda kishkene qorqaqtap, qobaljyǵanym ras. Alaıda synyp jetekshimmen alǵash tanysý sátinen bastap, qorqynyshym sý sepkendeı basyldy. Kerisinshe, ol kisiniń meıirimge toly júzi men mádenıeti meni aıryqsha baýrap aldy desem, artyq aıtqanym emes. Anam qandaı qadirli bolsa, ustazym da men úshin qymbat janǵa aınaldy.

Qazaq ádebıeti sabaǵy bolyp jatqan. Úı tapsyrmasy boıynsha  mánerlep óleń oqyp bolǵanym sol edi, ustaz maǵan burylyp, óleńdi túsinip jatqa oqyǵanymdy, mánerimniń óte jaqsy ekenin, sabaqty ylǵı  buljytpaı oryndaıtynymdy aıtyp maqtap ala jóneldi. Keýdemdi erekshe qýanysh sezimi bılep, synyptastarymnyń arasynda ózimdi erkin sezine bastadym. Sol sezim bólmeme kelgen soń, óleń joldaryma aınaldy.

Qoıatuǵyn baǵalap ár «besińmen»,
Ajarly ustaz, ketpeısiń máńgi esimnen.
Men sen úshin bir túıir dándeı bolsam,
Al, sen maǵan dıqansyń dándi ósirgen.

Qazbalaımyn oqýdyń kenin ár tań,
Óziń bergen bilimge senim artam.
Óleń oqyp, jyr jazyp júrgenim bul,
Ardaqty ustaz, bilemin seniń arqań!

Sodan beri árbir sabaqqa erekshe daıyndalamyn. Ásirese, ádebıet páni qatty unaıdy. Ustazym meni tek maqtaǵany úshin emes, boıymdaǵy senimsizdigim men qorqynyshymdy seıilterlik sózi meni yntalandyryp, shabyttandyra tústi.

Men de keleshekte dál siz sekildi ustaz bolǵym keledi, súıikti ustazym. Sizge degen rızashylyq sezimimdi óleńmen órnektegim keledi:

Baǵalaǵan balaýsa jyrymdy uǵym,
Oıyn aıtqan qaldyrmaı syryn búgip.
Jyp-jyly sóılegen sózderimen,
Jiberetin boıymdy jylyndyryp.

Jaıly tıer qushaqqa keńesimen,
Bıiktetip oıymdy men ósirem.
Jaqsylyǵy jasaǵan jetip jatyr,
Kete qoımas, ol sirá, el esinen.

---