InfoHub Logo

Burynyraq halyq ishinde ór minezdi, ójet sózdi, taqýa, taqpaqshyl bireý ótken eken. Ol bir baıdyń aýylyna qonyp jatqanda, bireýden surap mingen baıtalyn joǵaltypty. Kóp qarap iz-tuzy bolǵan soń aqyry eldiń záńgisine baryp:

— Záńgi taqsyr, aýylyńyzǵa qonyp jatqanymda jigitterińiz baıtalymdy urlap qoıdy, surap berińiz, — depti. Sonda záńgi:

— Kórseń aıt, áıtpese, betaldy sóıleme! — depti. Sonda álgi jigit osy rýdyń alman bolatyn topty jınalysyn tosyp júripti. Óıtkeni bul jınalysqa tútin basynan adam qalmaı qatynasady eken. El ábden jınalyp bolǵan kezde ol kenet kelipti de, záńgige qarap júrelep otyra qalyp:

— Eneńdi uraıyn, záńgi,
Qudaıdy bilmeıtin páńgi.
Kózińniń qyryn sal,
Qulaǵyńnyń birin sal,
Aryz aıtam degen, — eken.

— Ne aıtasyń? Aıtshy qane, — depti záńgi. Baıaǵydaǵy baıtal onyń esinen de kóterilip ketse kerek, sonda álgi jigit:

— Meniń aq baıtalymdy
Qıamette beremisiń,
Qıa bette beremisiń.
Qudaı aldynda beremisiń,
Qytaı aldynda beremisiń.
Bolys aldynda beremisiń,
Orys aldynda beremisiń.
Eger, bermeseń,
Qarǵap-qarǵap,
İshińdi keptirip,
Ókpeńdi bórttirip,
Ornyńnan turmastaı,
Moınyńdy burmastaı
Eteıin be? — depti. Sonda álgi jigit:

— Meniń aq baıtalymnan jegen etiń qan bolsyn.
Úıińdi qoıyn qulatyp,
Aýzy-basyń shań bolsyn.
El et jese,
Sen dert je.
El jal shaınasa,
Sen tal shaına.
El jilik jese,
Sen búlik je.
El moıyn jese,
Sen soıyl je.
El aıran jese,
Sen oıran ish.
Aýdarǵan tastaı bol,
Mujylǵan bastaı bol.
It minip ırek qamshylap,
Kózińnen jas tamshylap,
Qý súıek aryq,
Aıaǵyńda sharyq,
Tuqym-juraǵatyń ǵarip bolyp qurysyn, — degen eken. Sonda shydaı almaı záńgi ornynan ushyp turyp:

— Eı, mynanyń qarǵysy tym qatty eken, ońdyrmaıdy. Alǵanyń qazir aıtsań, aıyby joq, baspa-bas tóleısiń. Artynan bilinip qalsa, maǵan ókpelemeısiń, — depti. Sóz osy araǵa kelgende, otyrǵandar ishinen bireý ornynan turyp:

— Taqsyr, munyń baıtaly semiz eken, kózim túsip ketip men urlap soıyp tastaǵan edim, keshirińiz, — dep astyndaǵy atyn sol maıdanda túsip berip qutylǵan eken.

---