InfoHub Logo

Jer betindegi temperatýranyń kúrt kóterilýine sebep bolatyn «El-Nıno-Godzılla» qubylysy jahandyq klımatqa qaýip tóndirip, Ortalyq Azıa elderine, sonyń ishinde Qazaqstanǵa da qaterli áser etýi múmkin.

Bul týraly Infohub.kz aqparat agenttigi habarlaıdy.

Klımattyq apattyń alǵashqy belgileri

Muhıttyń ekvatorlyq tereńdiginen kóterilip kele jatqan bul qubylys jaı ǵana maýsymdyq aýytqý emes, kerisinshe, Jerdiń meteorologıalyq jaǵdaıyn túbegeıli ózgertýge qabiletti úlken apattyń bastamasy bolýy yqtımal. Álemdik boljaý ortalyqtary 2026 jyly adamzatty buryn-sońdy bolmaǵan tabıǵı synaq kútip turǵanyn aıtýda.

«El-Nıno-Godzılla» jáne Qazaqstan

Tynyq muhıttaǵy jasyryn prosester men Qazaqstandaǵy aptap ystyqtyń arasynda tikeleı baılanys joq sıaqty kóringenimen, jahandyq klımat zańdary muny joqqa shyǵarady. Planetanyń atmosferasy men gıdrosferasy qazba otyndardyń jaǵylýynan bólingen parnıktik gazdar áserinen qatty qyzyp ketken. Oǵan endi «El-Nıno» túrindegi tabıǵı temperatýralyq anomalıa qosylýda.

BUU Janyndaǵy Dúnıejúzilik meteorologıalyq uıymy (DMU) Ortalyq Azıanyń anomaldy nóser jaýyndar men jan tózgisiz aptap ystyqtyń nysanasyna aınalatynyn resmı túrde málimdedi. BUU Bas hatshysy Antonıý Gýterrısh bul jaǵdaıdy «klımattyq shuǵyl eskertý» dep atap, jańǵyratyn energıa kózderine kóshýdi jedeldetýge shaqyrdy.

Qubylystyń ereksheligi men qaýpi

Ǵalymdardyń alańdaýshylyǵy – «El-Nınonyń» Jerdiń klımattyq júıesi qatty qyzyp turǵan kezde kelýinde. Bul jahandyq jylynýdyń saldarymen qabattasyp, jańa sıkldy burynǵylardan áldeqaıda qaýipti etedi. Sarapshylar 2026 jyldyń jazy men kúzinde mı qaınatar ystyq bolatynyn, al 2027 jyl meteorologıalyq baqylaý tarıhyndaǵy eń aptap jyl atanýy múmkin ekenin boljaýda.

Qazaqstanǵa tóngen qaýipter

Klımattyq táýekelder kartasy boıynsha, Qazaqstan anomaldy jaýyn-shashyn, sý tasqyny jáne qurǵaqshylyq qaýpi joǵary aımaqtardyń qataryna endi. Keıbir sarapshylar eldiń eki jyl boıy mundaı tabıǵat soqqysyna tótep bere ala ma dep alańdaýshylyq bildirýde. Qazgıdromet mamandary jahandyq prosesterdiń el ishinde ekstremaldy aýa raıynyń yqtımaldyǵyn arttyratynyn rastap, biraq ýaqytynan buryn úreıge boı aldyrmaýǵa shaqyrdy.

«El-Nıno» tek klımattyq faktorlardyń biri ǵana. Qazaqstandaǵy aýa raıy jaǵdaılary aımaqtyq sırkýlásıaǵa, topyraq ylǵaldylyǵyna jáne basqa da atmosferalyq prosesterge baılanysty. Sondyqtan Qazaqstan úshin qandaı da bir kepildi saldarlar týraly aıtý áli erte», – deıdi mamandar.

Degenmen, jalpy kórinis shoshytady. Álemdik basylymdardaǵy eskertýler adamzattyń aýa raıy álemdi dúrbeleńge salatyn dáýirge qadam basqanyn kórsetedi.