InfoHub Logo

Osy ýaqytqa deıin ózimdi, oıymdy ózgertýge septigin tıgizetin kóptegen motıvasıalyq kitaptardy oqyǵan bolatynmyn. Olardyń árqaısysy sanamdy jańǵyrtyp, az da bolsa  ómirge basqasha kózqaraspen qaraýdy úıretti. Alaıda, jýyrda ǵana qolyma túsken «Túısigińmen oılaı bil» atty kitaptyń oı-sanamdy damytýǵa qosqan úlesi olardan da asyp tústi. Qazaqshaǵa Myrzageldi Kemel aýdarǵan kanadalyq belgili jazýshy Djon Kehonyń bul kitaby-  nólden bastap ózin-ózi jetildirýdi maqsat etken árbir adam úshin taptyrmas týyndy. Sebebi, munda boıyńyzdaǵy kemshilikterden arylyp, tabysqa kenelýdiń, armanyńyzǵa jetýdiń ońaı ári tıimdi ádis-tásilderi berilgen.  Eń bastysy- avtor keıbireýler sıaqty qur «ádemi» sózdermen  aqyl aıtpaıdy, óziniń jáne aınalasyndaǵylardyń  tabysqa jetý jolyndaǵy erekshe ári júzege asqan tájirıbelerimen bólisedi. Ol barlyq ıgilikter men sáttilikterdiń bastaýy mıdyń kúshin durys paıdalanýda dep sanaıdy. 
Tabys pen baqytqa jetý qaǵıdattaryn qamtıtyn atalmysh kitap 19 bólimnen  turady. «Shynaıy ómirge ózge kózqaras» atty alǵashqy bóliminde ómirge basqasha kózqaraspen qaraý jaıly, al ekinshi «Sana»bóliminde  oı-sanamyzdyń ómirimizge áseri týraly aıtylǵan. Odan keıingi bólimder -«Kózge elestetý, nemese oısha kórýde»  kózge elestetýdiń qalaǵan maqsatqa jetýdegi  kómegi, «Oıdy qalyptastyrýda» sanamyzǵa jaqsy oılardy uıalatý týraly sóz qozǵaıdy. Kelesi «Sendirý» ,«Túsiný» bólimderinde ózimizdi sáttilikke sendire bilýge, al «Túısikte» syrtqy jaǵdaıdy ózgertý úshin aldymen ishki jan dúnıemizdi ózgertýge úndeıdi. Avtor «İshki daýysta» bizdi týra jolǵa bastaıtyn eń senimdi serigimiz-ishki daýystyń qudyreti, «Tús kórýde» tústiń ómirimizge áserin sóz etedi. «Shynaıy ómir» bóliminde ómirdiń kez kelgen keleńsizdikterine mı kúshi arqyly qarsy turý, kelesi «Zeıin qoıý jáne oılaý» bóliminde durys oılaı bilý, mıymyzdy belgili bir ıdeıaǵa   nazar aýdartý joldaryn  túsindiredi. «Kózqarastar jáne olardyń qalyptasýynda» kez kelgen jańa kózqarastyń qalyptasyp, gúldenýi úshin ýaqyt jáne oǵan kóńil bólýdiń, «Óz-ózińizdi baǵalaýda» ózimizdi jaqsy kórip, durys baǵalaı bilýdiń mańyzy jóninde aıtyp ótedi. «Shyǵarmashylyq ıkemdilik» bóliminde–  sátti ómir súrý úshin qajetti biliktilik-  shyǵarmashylyq ıkemdilik, al «Problema joq, tek qana múmkindikter» bóliminde problemalar bizge berilgen  múmkindikter ekenine nazar aýdartady. «Ózińizdi emdeńiz», «Tabysker adamnyń sanasy» bólimderinde tabysty adamnyń sanasyn qalyptastyrý úshin qajetti tásilderdi atap kórsetse,, sońǵy «Bizdiń qarym-qatynastarymyz», «Bar kúsh-jigerińizben jattyǵyńyz» bólimderinde aınalamyzben ornyqty qarym-qatynas ornatýdyń, úzilissiz damý jolyndaǵy turaqty túrdegi tájirıbeniń paıdasyn sóz etedi. 
Belgili fılantrop óz kitabyn «Bul kitap sizge qajetti qasıetterdi damytatyn ádisterdi qamtıdy, sonymen qatar, siz óz boıyńyzdaǵy áleýetten óte kóp ala alasyz. Biraq, ol úshin tek qana kitapty oqý jetkiliksiz. Siz ózińizben jumys jasaýyńyz kerek. Sizdi múmkindikterge toly, qyzyq ómir kútip tur. Sizdiń qıalyńyzdaǵy armandaryńyz – bári óz qolyńyzda. Barlyǵy daıyn, sizdi kútip tur. Al, siz daıynsyz ba?» dep qorytyndylaıdy. 
Damýdyń dańǵyl jolyna bastaıtyn «Túısigińmen oılaı bil» kitaby arqyly ózimdegi sátsizdikterdiń sebebin túsinip qana qoımaı,  armanymdy shyndyqqa aınaldyrýdyń amal-tásilderimen  tanys boldym. Erekshe erik-jiger beretin bul kitaptyń sizderge de paıdasy tıerine senimdimin. Oqyńyz, oılanyńyz, ózgerińiz!
   

   

---