InfoHub Logo

Jelide tanymal prodúser Baıan Alagózovanyń «KeshYou» tobynyń 20 jyldyǵyna oraı túsirilgen jańa jobasy qyzý talqyǵa túsip jatyr. Alaıda, keıbir kórermender bul týyndyny «óte álsiz» dep baǵalap, prodúserdi arzan haıp izdedi dep aıyptady.

Bul týraly Infohub.kz aqparat agenttigi habarlaıdy.

Facebook jelisinde Gaýhar Ótelbaeva esimdi qoldanýshy fılmge qatysty pikirin jazdy. Ol Baıan Alagózovany qurmetteıtinin aıta kelip, bul jobanyń kóńil kónshitpegenin jetkizdi. Pikirinshe, týyndyda shyǵarmashylyq joldan góri, top ishindegi «las» oqıǵalarǵa basymdyq berilgen.

«Las dúnıelerdi kórermenge usyný ıdeıasy baıqalady»

«Másele montaj ben sýrettiń sapasynda emes. Másele bizge neni «jegizgisi» keletininde! Kórermenge las dúnıeler, urys-keris, ishki janjaldar arqyly shoý usyný ıdeıasy birden baıqalady. Óıtkeni bul jaqsy ótedi. Biraq men buǵan kelispeımin! Shoý-bıznestegi áıelder, olardyń ósý joly men ındýstrıa týraly óte myqty, laıyqty dúnıe jasaýǵa bolar edi. Qaraýǵa uıalatyn «as úıdegi» urys-kerissiz-aq», – dep jazdy jeli qoldanýshy.

«KeshYou» tobynyń «ańyz» ekenine kúmán keltirdi

Avtor sonymen qatar, «KeshYou» tobynyń «ańyz» ekenine de kúmán keltirdi. Ol toptyń ýaqyt synynan ótken myqty hıtterin esine túsire almaıtynyn, al odan shyqqan ánshilerdiń (Janar Duǵalovany qospaǵanda) tutas bir dáýirdi aıqyndaıtyn juldyzǵa aınalmaǵanyn alǵa tartty.

«Shý úshin jasalatyn shoý jeter!»

Pikir avtory Baıan Alagózovaǵa tikeleı úndeý jasap, «Sizdiń deńgeıińiz ben mártebeńizde birdeńeni janjal arqyly dáleldeýdiń qajeti joq. Eki-úsh kún talqylanyp qoıa salatyn emes, shynymen iz qaldyratyn ónim kórgimiz keledi. Shý úshin jasalatyn shoý jeter endi! Ózińizdiń qolyńyzdan keletindáı shynymen myqty dúnıe berińizshi!» dep jazdy.

Aıta keteıik, áleýmettik jelide bul pikirdi kópshilik qoldap, fılmniń tym ashyq ári daýly tustaryn synap jatqan oqyrmandar qarasy qalyń.