InfoHub Logo

OQO, Maqtaral aýdany
"T. Aýbakırov atyndaǵy jalpy orta mektebi"
tarıh páni muǵalimi Alıbekova Tárbıe Qanturǵanqyzy

"Tarıhtaǵy qaharman tulǵa"

Tarıh ǵylymynyń tuńǵysh doktory Ermuhan Bekmahanovtyń 100 jyldyq mereı toıyna arnalǵan tanymdyq saǵat)

Sabaq maqsaty:
Bilimdilik: Stalınızmniń qurbany bolǵan, tuńǵysh keńes tarıhshylarynyń biri ári biregeıi, tarıh ǵylymynda doktor ataǵyna tuńǵysh ıe bolǵan azamatymyz, profesor, Qazaqstan Ǵylym akademıasynyń korespondent múshesi Ermuhan Bekmahanovtyń ómiri men qyzmet oryndary týraly rýhanı bilim berý. Qazaq tarıhynyń negizin salýshy ekenine kózderin jetkizý.
Damytýshylyq: Qazaq halqynyń daryndy tulǵasyn tarıh ǵylymynyń negizin salýshy retinde nasıhattaý arqyly shyǵarmashylyq daǵdylaryn qalyptastyrý.
Tárbıelik: E. Bekmahanovtyń ónegeli ómirin nasıhattaı otyryp, ótken tarıhymyzǵa zer salǵan óskeleń urpaqty erlikke, eldikke tárbıeleý.
Kórnekiligi: slaıdtar kórsetý, sýretter.
Ádis - tásilderi: STO strategıalary, zertteýshilik áńgime.
Barysy: İ. Qyzyǵýshylyǵyn oıatý. "Boljaý" strategıasyn qoldana otyryp,"Órmekshi tory" oıyny arqyly oqýshylardyń E. Bekmahanov ómir joly týraly bilimderin baıqaımyn. Oqýshylar bir - birine ǵalymnyń otbasy, balalyq shaǵy, shyǵarmalary týraly bir - birine suraqtar qoıdy. Trenıńke qatysa otyryp kóńil - kúıleri kóteriledi, qyzyǵýshylyǵy artady.
Dáıeksóz:
«Jaqsynyń eskertkishi – jaqsylyǵy» - dep aqyn aıtpaqshy, eline eńbegi sińgen Ermuhan Bekmahanov meniń esimde emes, búkil halyq jadynda, áleýmet júreginde.
Sálken Sýhanberdın

İİ. Muǵalimniń kirispe sózi:
Qazaq halqynyń daryndy tulǵasy tarıh ǵylymynyń doktory, ulaǵatty ustaz Ermuhan Bekmahanov 2015 jyldyń 15 aqpanynda 100 jasqa tolar edi. Jaryq juldyzdaı aǵyp ótken qasqaǵym ómirinde ol ózin halqynyń adal perzenti retinde kórsete bildi. Tarıhı tulǵanyń ómiri men qyzmeti, ǵylymı zertteý eńbekteri, zıaly qaýymnyń oı pikirleri týraly sizdermen pikir alysyp, oı bólisemiz.
1 - oqýshy: Hamza Abdýllın (08. 05. 1966 j.)

"Ermuhan Bekmahanovqa"

Syzdaıdy janym, muzdaıdy qanym, jan aǵa!
Bul sýyq habar syımaıdy saıyz sanama.
Eresen oıly erkesi ediń elińniń,
Uqsaıtyn erek úzdik bir týǵan danaǵa.

Saǵan da tóndi ajal ashqan aranyn,
Qazaǵyń – halqyń deýshi edi seni: «Qaraǵym!»
Tún kelip qushyp, júregim isip, aýyr oı –
Párshalap jyrtyp, ulǵaıtty aýzyn jaranyń.

Shoqanym ediń dáýirime sándi túr bergen.
Kórki ediń kúlgen elimniń mynaý gúldengen.
Teńizdeı tasyp, qıaǵa asyp, tik basyp,
Nadandyq bultyn serpe bir qýyp, nurǵa engen.

Qanyshym meniń, Muhtarym ediń samǵaǵan,
Eliniń esken dańqyna dańqyn jalǵaǵan.
Órine órlep órkendi mynaý ómirdiń,
Oıpanda ótken butaǵa kózin salmaǵan.

Armanda kettiń, zarlaýda ótti, asyl eń,
Bástesken eldiń bárinen de óziń basym eń,
Aspanda kólbep, asqarǵa órlep, bilimniń
Kóz jetpes zańǵar shyńyna shyrqap asyp eń.

Máńgige qosh bol, eńireıin endi, baýyrym,
Azaly halqyń shegýde bastan aýyr kún.
Shermenen júrip shejiresin sherttiń elińniń,
Shejirede sol bir máńgi aıqyn endi qalýyń!
2 - oqýshy: Ómirbaıandyq derekteme.
Ermuhan Bekmahanov 1915 jyldyń 15 aqpanynda Pavlodar oblysy, Baıanaýyl aýdanynda №10 aýylda Jasybaı degen jerde dúnıege keldi. Baıanaýyldaǵy 7 jyldyq mektepti támámdaǵan soń, 1932 jyly Semeıdegi joǵary oqý ornyna daıarlaıtyn bir jyldyq kýrsty oqyp shyǵady. 1933 jyly Qazaq Oqý – aǵartý halyq komısarıatynyń joldamasymen Voronej qalasyndaǵy memlekettik pedagogıkalyq ınstıtýtqa qabyldanyp 1937 jyly tarıh fakúltetin bitiredi.