InfoHub Logo

Bári de qaryz suraýdan bastalady. Aqsha júrgen jerde, uıat synǵa túsedi. Qaryzdy alǵan adam emes, qaryzdy bergen adam uıalyp júredi.
- Keshirińiz, - deıdi qaryzyn surap kelýshi qysyla turyp. - sizderde alashaǵymyz bar edi.
- Alashaǵyń bolsa neǵyl deısiń endi?! - deıdi úı ıesi áıel shaptyǵa sóılep. - Byltyr ǵoı alǵanymyz, áli tolyq bir jyl da bolǵan joq.
- Sizder bir aıdan keıin qaıtaramyz degensizder.
- Bir aıdan keıin qaıtaramyz desek, aqsha bolmaı jatqan joq pa?! - deıdi úı ıesi áıel odan ári shaptyǵyp.
- Sizderden yńǵaısyz boldy-aý, - deıdi qaryzyn surap kelýshi qysyla túsip. - Qaıta-qaıta aqshamdy surap kele bergenim uıat boldy-aý.
- Onyń nesine qysylasyń, shyraǵym, - deıdi úı ıesi áıel qaryzyn suraýshyny jubata sóılep. - Qysylma. Eńseńdi tik ustap júr. - O, táńirim, - deıdi sonan soń úı ıesi áıel suńqyldaı sóılep. - toba dep otyrǵan úı edik, bul jurtqa ne bolǵan túge, osy úıden qaıta-qaıta qaryzyn surap kele bergeni nesi?! Shyraǵym, bylaı turshy, esiktiń kózinde erbıip turyp almaı. Jaryq bershi. Tamaǵymyzdy da jóndep ishkizbediń ǵoı.
Osy kezde ishki bólmeden isińki kózinen uıyqtap turǵandyǵy belgili bolyp turǵan, máıkisheń osy úıdiń otaǵasy shyǵady.
"Úmitim osy kiside, - deıdi qaryzyn surap kelýshi ishteı. - bir túsinse, osy aǵa ǵana túsinedi".
- Aǵaa, - deıdi daýsy dirildeı sóılep.
- Mynaý neǵyp júr?! - deıdi erkek áıeline alara qarap.
- Byltyrǵy alǵan zattyń aqshasyn suraı kelipti.
- Biz bir jaqqa kóship bara jatyrmyz ba eken?! - Erkek áńkildep ketedi. - Shyraǵym-aý, biz eshqaıda da kóship bara jatqan joqpyz ǵoı!
- Áke-sheshem eshqaıda da kóship bara jatqan joq! - deıdi osy úıdiń úlken uly qaryzyn suraýshyǵa qarap zirkildep.
- Kóship bara jatqan joq! - deıdi osy úıdiń qyzy búıirin taıanǵan kúıi shaptyǵa til qatyp. - Eshqaıda da kóship bara jatqan joq!
- Kóship bara jatqan joq. - Bul daýys qaıdan shyqty taǵy? Besiktegi sábı sóılep jatyr eken.
- Kóship bara jatqan joq, - deıdi sábı ap-anyq etip. - Eshqaıda da kóship bara jatqan joq qoı. - Sonan soń: - Nege uryp jibermeısińder? - deıdi besik ishinen shyqqan daýys. - Jabylyp uryp jiberseńdershi, sosyn aqshasyn surap kelmeıtin bolady. Itti bosatyp qoıa beretin eken.
"Qoı, keteıin, - deıdi qaryzyn suraýshynyń óńi qýqyl tartyp. - Esim barda, elimdi tabaıyn".
Qaryzyn suraýshy ketisimen, bári jamyraı kúlisedi.
Besik ishinen shyqylyqtaǵan kúlki estiledi.
Uıada ne kórse...

---