InfoHub Logo

AQSH-tyń Denver halyqaralyq áýejaıynda jolaýshylar ushaǵynyń ushý jolaǵyndaǵy adamdy qaǵyp ketýi saldarynan qaıǵyly oqıǵa boldy. Frontier Airlines áýe kompanıasyna tıesili Airbus A321 ushaǵy Los-Andjeles baǵytynda ushýǵa daıyndalyp jatqanda, jolaqta júrgen adamdy basyp ozdy.

Bul týraly Infohub.kz aqparat agenttigi habarlaıdy.

Oqıǵa 8 mamyr kúni keshki ýaqytta tirkelgen. Soqqydan adam sol jerde qaza tapty. Sonymen qatar, ushaq qozǵaltqyshynda qysqa ýaqytqa órt shyqqany habarlandy. Órt sóndirý qyzmeti jalyndy tez arada joıdy.

Ushaqta 224 jolaýshy men 7 ekıpaj múshesi bolǵan. Oqıǵanyń aýyrlyǵyn sezingen ushqyshtar reısti toqtatý týraly sheshim qabyldady.

Ekıpaj ben dıspecher dıalogy

Áleýmettik jelide ekıpaj ben dıspecher arasyndaǵy baılanys jazbasy tarady. Onda ushqysh:

«Dıspecher, Frontier 4345. Biz ushý jolaǵynda toqtap turmyz… Biz bireýdi qaǵyp kettik… qozǵaltqyshta órt shyqty», – dep habarlaǵan. Keıin ekıpaj komandıri ushaq ishinde tútin paıda bolǵanyn aıtyp, jolaýshylardy shuǵyl evakýasıalaý qajettigin jetkizdi.

Borttaǵy adamdar úrlemeli traptar arqyly ushý jolaǵyna túsirilip, arnaıy avtobýstarmen termınalǵa jetkizildi. Aldyn ala málimetter boıynsha, bir jolaýshy jeńil jaraqat alǵan. Ushaqtaǵy barlyq adam medısınalyq tekserýden ótti.

Tergeý bastaldy

Frontier Airlines kompanıasy oqıǵanyń sebep-saldaryn anyqtaý úshin áýejaı ákimshiligimen jáne qaýipsizdik qyzmetterimen birlesip jumys istep jatqanyn málimdedi. Qazirgi tańda Denver polısıasy men AQSH-tyń Ulttyq kólik qaýipsizdigi keńesi tergeý júrgizip jatyr. Mamandar adamnyń ushý jolaǵyna qalaı kirip ketkenin anyqtaý úshin áýejaı aýmaǵyndaǵy qorshaýlar men qaýipsizdik júıesin muqıat tekserýde.