InfoHub Logo

Қырғызстан президенті Садыр Жапаров Камчыбек Ташиевтің мемлекеттік қызметтен не себепті босатылғаны туралы пікірін білдірді. Бұл туралы Infohub.kz ақпарат агенттігі хабарлайды.

«Қызметінен босатылмай тұрып, мен досыма хабарласып, жағдайды түсіндірдім. Одан кейін оны қызметінен босату туралы шешім қабылдадым», - деді Жапаров «Кабар» агенттігіне берген сұхбатында.

Досын дұрыс жолдан тайдырғандар

Президенттің айтуынша, бұл шешіммен ол өзінің досын керісінше қорғап қалған. Себебі, Ташиевтің жанында жүрген кейбір адамдар оны «дұрыс жолдан тайдырған».

«Олар Камчыбек Ташиевтің атын жамылып, парламент депутаттарына, жауапты мемлекеттік қызметкерлерге және қоғамдағы белді тұлғаларға «Генералдың жағына шығыңдар» деп жүгіне бастаған», - деп қосты Жапаров.

Мемлекеттің тұрақтылығы бәрінен маңызды

Мемлекет басшысы егер Ташиевті қызметінен алмағанда, оның айналасындағылардың әрекеті салдарынан мұндай жағдайлар одан әрі ушыға түсетінін айтты. Бұл мемлекеттік қызметкерлер мен қоғам арасында іріткі тудырып, тіпті қақтығыстарға ұласуы мүмкін еді.

«Сондықтан мен досымды қызметінен босату туралы шешім қабылдауға мәжбүр болдым. Мен үшін мемлекеттің тұрақтылығы бәрінен маңызды», - деп түйіндеді президент.

Айта кетейік, Камчыбек Ташиев 13 ақпанға қараған түні Қырғызстанға оралған болатын.

Еске сала кетсек, 10 ақпанда Қырғызстан президенті Садыр Жапаровтың жарлығымен Камчыбек Ташиев вице-премьер – Ұлттық қауіпсіздік мемлекеттік комитетінің (ҰҚМК) төрағасы қызметінен босатылғаны хабарланған еді.