InfoHub Logo

Жамбыл облысында әскери борышын өтеп жүрген сарбаз қаза тапты. Алдын ала мәлімет бойынша, жауынгер қарумен жұмыс істеу кезінде өзіне оқ тиіп мерт болған.

Бұл туралы Infohub.kz ақпарат агенттігі хабарлайды.

Қайғылы оқиға және тергеу барысы

Бас прокуратураның мәліметінше, қайғылы оқиға 27 қаңтарда болған. Қазір бұл дерек бойынша ІІМ-нің әскери-тергеу органдары сотқа дейінгі тергеуді бастады. Арнайы жедел-тергеу тобы құрылып, істің барысын Бас прокурор жеке бақылауына алды.

Оқиғаның алдындағы жағдайларды анықтау мақсатында Қорғаныс министрінің орынбасары, Бас әскери прокурор және ІІМ Әскери-тергеу департаментінің бастығы оқиға орнына жіберілді.

Әскери бөлімдердегі қауіпсіздік

Арнайы топқа елдегі барлық әскери бөлімдегі тәртіп пен жеке құрамның қауіпсіздік талаптарын тексеру тапсырылды. Жақын арада Бас прокуратураның арнайы алқа отырысында әскери қызметшілердің өмірі мен денсаулығын сақтау, сондай-ақ мерзімді қызметтің қауіпсіздігін қамтамасыз ету мәселелері қаралады.

Бұған дейін, 23 қаңтарда Шығыс Қазақстан облысының Жаңғызтөбе кентінде орналасқан 47007 әскери бөлімінде қарауылда тұрған сарбаз өзіне оқ атқан болатын.