InfoHub Logo

تانىمال ءانشى ساكەن قالىموۆ ومىردەگى ەڭ ۇلكەن وكىنىشى تۋرالى اشىق ايتىپ، جان سىرىن توكتى. ول «مىڭ ءبىر ءتۇن» باعدارلاماسىنا بەرگەن سۇحباتىندا وتباسىنىڭ ءقادىرىن دەر كەزىندە بىلمەگەنىنە قىنجىلىسىن ءبىلدىردى.

بۇل تۋرالى Infohub.kz اقپارات اگەنتتىگى حابارلايدى.

وتباسىنىڭ ءقادىرىن بىلمەگەنىمە وكىنەمىن

ءانشىنىڭ ايتۋىنشا، جاستىق شاقتاعى شالقىعان ءومىر، ىشىمدىك پەن سەرىلىك سالدارىنان جارى مەن بالاسىنىڭ باعاسىن تۇسىنبەگەن.

«قۇدايدىڭ قوسقان جارىنىڭ، وتباسىنىڭ ءقادىرىن بىلمەدىك. سونداي وكىنىشتەرىم بار. ال ونەرگە دەگەن وكىنىش جوق. جارىمنىڭ، بالامنىڭ ءقادىرىن بىلمەي، اجىراسقانىما وكىنەمىن»، – دەدى ول.

قالىموۆ ءوزىنىڭ قاتەلىكتەرىن مويىنداپ، ونى مويىنداۋدى ەرلىككە بالاپ وتىر. ول ءوزىنىڭ كىنالى ەكەنىن ايتىپ، زامانعا نەمەسە جارىنا سىلتاۋ ىزدەمەدى.

ۇلىمەن اراداعى قارىم-قاتىناس

ءانشى ۇلىمەن اراداعى بايلانىستىڭ ۇزىلگەنىن دە جاسىرمادى. دەگەنمەن، ول ۇلىنىڭ وكپەسىن تۇسىنەتىنىن جانە وعان رەنجىمەيتىنىن ايتتى.

«ازىرگە ورتامىزدا مۇلدەم بايلانىس جوق. تۇسىنەمىن، وكپەلەمەيمىن، ول كىسىلەردىكى دۇرىس. دۇعادامىن، ءبىر جولىقساق كەشىرىم سۇراپ، سىي-سىياپات جاساپ، كوڭىلدەرىن تاپسام دەپ ءجۇرمىن. ول كۇن دە الىس ەمەس»، – دەدى ءانشى.

ساكەن قالىموۆتىڭ ءبىرىنشى ايەلىنەن ۇلى، ەكىنشى ايەلىنەن قىزى بار. قازىرگى ۋاقىتتا قىزىمەن ارالاسىپ تۇرادى.