InfoHub Logo

ق ر وقۋ-اعارتۋ ءمينيسترى اسحات ايماعامبەتوۆ ءبىلىم بەرۋ ستاتيستيكاسى كەزەڭ-كەزەڭىمەن كوپشىلىككە قولجەتىمدى بولاتىنىن ايتتى.

ءمينيستردىڭ ايتۋىنشا، ءبىلىم بەرۋ سالاسىنداعى ەڭ ماڭىزدى اقپاراتتىق جۇيە – ول ۇلتتىق ءبىلىم بەرۋ دەرەكتەر قورى (ۇبدق).

جۇيەدە مەكتەپكە دەيىنگى، ورتا، تەحنيكالىق جانە كاسىپتىك، قوسىمشا ءبىلىم بەرۋ دەڭگەيىندەگى بارلىق ستاتيستيكا مەن ءبىلىم سالاسىنداعى اقپارات بار. دالىرەك ايتقاندا، وقۋشىلاردىڭ العان باعالارى مەن جەتىستىكتەرى، مۇعالىمدەردىڭ بىلىكتىلىگى، مەكتەپتەردىڭ، كوللەدجدەردىڭ، بالاباقشالاردىڭ ماتەريالدىق-تەحنيكالىق قورى جانە ت.ب.«بۇرىن ۇبدق-داعى دەرەكتەردى تەك ءبىلىم سالاسى قىزمەتكەرلەرى عانا پايدالانسا، ەندى بارلىق اقپارات جۇرتشىلىققا، ساراپشىلارعا، زەرتتەۋشىلەرگە، اكىمدىكتەرگە جانە باسقا دا مەملەكەتتىك ورگاندارعا بىرتە-بىرتە جانە ءارتۇرلى دارەجەدە قولجەتىمدى بولادى.قازىرگى ۋاقىتتا ءبىلىم بەرۋ ستاتيستيكاسىن جيناۋ تەتىگىن تولىعىمەن قايتا قاراۋ جۇمىستارى جۇرگىزىلىپ جاتىر. ونى نەگىزىنەن ەلەكتروندى جۋرنالدار جۇيەسىنەن الىناتىن باعالاردى قوسپاعاندا، ۇبدق-دا ءاربىر ءبىلىم بەرۋ ۇيىمىنا جاۋاپتى تۇلعالاردىڭ وزدەرى تىكەلەي ەنگىزەتىن. ەندى ءقازىر بۇلتتى بۋحگالتەريا، ەلەكتروندى قۇجات اينالىمى جانە ەلەكتروندى كادر، ەلەكتروندى اتتەستاسيا جانە باسقا دا جۇيەلەردەن بارلىق نەگىزگى اقپاراتتى اۆتوماتتى تۇردە جيناۋ شارالارى جۇرگىزىلىپ جاتىر. ياعني بارلىق اقپارات اۆتوماتتى تۇردە دەرەكتەر قورىنا تۇسەدى»، - دەپ جازادى مينيستر. ياعني، ەندىگى جەردە ءبىلىم بەرۋ جۇيەسىنىڭ اشىقتىعىن قامتاماسىز ەتۋ ءۇشىن ۇلتتىق ءبىلىم بەرۋ دەرەكتەر قورىنان (ۇبدق) ءارتۇرلى قۇرىلىمدارعا، زەرتتەۋشىلەرگە جانە جۇرتشىلىققا ارنالعان يەسىز دەرەكتەر بەلگىلى ءبىر پارامەترلەر بويىنشا كەزەڭ-كەزەڭىمەن جالپىعا قولجەتىمدى بولادى. بەلگىلى ءبىر پارامەترلەر بويىنشا كەز كەلگەن ادام ستاتيستيكالىق دەرەكتەردى باقىلاي الادى.

---