كير پاتشانىڭ ساقتارعا جورىعى
ەرتەدە ءبىزدىڭ جەرىمىزدە ەركىندىك سۇيگىش ساقتار ءومىر سۇرگەن. شامامەن ەكى جارىم مىڭ جىل بۇرىن قۇدىرەتتى پارسى پاتشاسى كير ولاردى باعىندىرۋدى ويلايدى. ونىڭ اسكەرىنىڭ تەگەۋرىنىنە ەشكىم توتەپ بەرە المايتىن. كيردىڭ جەڭىمپازدىعى تۋرالى داقپىرت الەمدى شارلاپ كەتكەن. الايدا ساقتاردى باعىندىرامىن دەگەن ويى ىسكە اسپاي، كەرىسىنشە، بۇكىل الەمگە ماسقاراسى شىعادى. وقيعا بىلاي بولعان ەكەن.
كير جاقسى قارۋلانعان اسكەرىن ساق-ماسساگەتتەردى باعىندىرۋعا اتتاندىرادى. ساق-ماسساگەتتەردىڭ پاديشاسى ەر جۇرەك توميريس ەدى. كير وعان ەلشىسىن جىبەرىپ «ماعان تۇرمىسقا شىقسىن» دەگەن ۇسىنىس جاسايدى. پاديشا كيردىڭ ويى وزىندە ەمەس، پاتشالىقتى يەلەنۋ ەكەنىن ءتۇسىنىپ، وڭ قاباق تانىتپايدى. ول كير اسكەرىنىڭ وزەننىڭ ارعى بەتىندە — شەكارادا تۇرعانىن بىلگەندىكتەن، ەلشى جىبەرىپ، كەرى قايتۋىن ۇسىنادى. الايدا پارسىلار وزەننەن ءوتىپ، ماسساگەتتەردىڭ توبىنا جاۋىزدىقپەن شابۋىل جاسايدى.
ولار ءتوميريستىڭ ۇلى سپارگاپيستى تۇتقىنعا الادى. پاديشا تاعى دا كيردەن جەرىنەن كەتىپ، سپارگاپيستى ازات ەتۋدى تالاپ ەتەدى. ءبىراق كير شابۋىلىن جالعاستىرا بەرەدى. وسى كەزدە بۇعاۋدان قۇتىلعان سپارگاپيس وزىنە قول جۇمسايدى. ىزاعا بۋلىققان توميريس كير اسكەرىن تولىق تالقاندايدى. وسى شايقاستا پارسى پاتشاسى كير ءولىپ، ونىڭ 200 مىڭ جاۋىنگەرى جەر جاستانادى. پاديشا توميريس «ىزدەگەنىڭ قان ەدى، ال ءىش، ەندەشە!» دەپ ونىڭ باسىن قان تولتىرىلعان مەسكە باتىرادى.
پارسىلار ساقتاردىڭ ەركىندىك ءۇشىن ءوز ءومىرىن قيۋعا ءازىر ەكەنىن ءتۇسىنىپ، باسقىنشىلىق جورىقتارىن توقتاتادى.
You Might Also Like
-
ىشتەگى قاتپارلار سىمباتىڭىزدى بۇزىپ قانا قويماي، قانت ديابەتى مەن جۇرەك اۋرۋلارىنا دا سەپ بولۋى مۇمكىن. سوندىقتان ولاردان تەز ارادا قۇتىلعان ءجون.
-
قىزىلاياق باقا — جالپى كەلبەتى مەن دەنە ءپىشىنى جاعىنان (ۇزىندىعى 8 سم) ءسۇيىرتۇمسىق باقاعا ۇقساس، ءبىراق دەنەسىنىڭ تومەنگى جاعى اشىق قىزىل داقتى (كوكتەمدە — قىزعىلت). قازاقستاندا تەك بالقا...
