InfoHub Logo

قازاقستان مۇعالىمدەرىن اتتەستاسيالاۋ جۇيەسىندە ەلەۋلى وزگەرىستەر قاراستىرىلۋدا. جاڭا جۇيە بويىنشا مۇعالىمدەر ەندى ءوز ءپانى بويىنشا ءبىلىمىن دالەلدەيتىن سىناق تاپسىرمايدى. بۇل وزگەرىس پەداگوگتەر اراسىندا قىزۋ تالقىلاۋ تۋدىردى.

بۇل تۋرالى Infohub.kz اقپارات اگەنتتىگى حابارلايدى.

پاندىك تەستتەن كىمدەر بوساتىلادى؟

بۇرىن مۇعالىمدەر بىلىكتىلىك ساناتىن الۋ ءۇشىن پاندىك سىناقتان وتۋگە مىندەتتى بولاتىن. الايدا، جاڭا جۇيەدە بۇل تالاپ الىنىپ تاستالادى. بۇل وزگەرىس پەداگوگتەردىڭ ساناتى كوبەيۋىنە ىقپال ەتۋى مۇمكىن.

ءبىلىم بەرۋ سالاسىنداعى ساراپشى اياتجان احمەتجان ۇلى بۇل جاڭالىققا قارسى شىعىپ، ءمۇعالىمنىڭ ءوز ءپانىن جەتىك ءبىلۋى جانە كەز كەلگەن سىناقتان وتە الۋى كەرەكتىگىن العا تارتادى. ونىڭ ايتۋىنشا، مينيسترلىك مالىمەتتەرى بويىنشا، بيىل قاڭتاردا مۇعالىمدەردىڭ 52،6%-ى پاندىك تەستتەن وتە الماعان. سوندىقتان تەستتى الىپ تاستاۋ – دامۋعا دەگەن ۇمتىلىستى جويىپ، كاسىبي ءوسۋدى تەجەۋمەن تەڭ دەيدى ساراپشى.

ال ق ر اعارتۋ مينيسترلىگى جانىنداعى قوعامدىق كەڭەس مۇشەسى ومىر شىنىبەكۋلى پاندىك تەستتىڭ الىنۋىن قۇپتايدى. ول سوڭعى جىلدارى تەست تاپسىرۋ كەزىندە سىبايلاس جەمقورلىق تاۋەكەلدەرىنىڭ ارتقانىن ايتادى. تەستتەن باس تارتۋ جۇيەنى مۇعالىمدەر مەن قوعام ءۇشىن دە اناعۇرلىم اشىق ءارى ىڭعايلى ەتەدى دەپ سانايدى.

اتتەستاسيادان وتۋشىلەرگە قانداي وزگەرىستەر بار؟

بيىل اتتەستاسيادان ءوتۋدى باستاعان مۇعالىمدەر ەسكى جۇيە بويىنشا جۇمىستارىن اياقتايدى. بۇعان دەيىن 51 مىڭ ءمۇعالىم تەستتەن ءوتىپ، قاجەتتى بالل جيناعان. ولار پورتفوليولارىن ۇسىنىپ، اتتەستاسيانىڭ قالعان كەزەڭدەرىنەن وتە الادى. ءساتتى اياقتاعاندار قىركۇيەكتەن باستاپ ءتيىستى قوسىمشا اقى الا باستايدى.

العاشقى تەستتەن ءوتۋ بالىن جيناي الماعان، ءبىراق ءتيىستى پورتفوليوسى بار مۇعالىمدەرگە شىلدە ايىندا تەستتى قايتا تاپسىرۋعا مۇمكىندىك بەرىلەدى. ەگەر قايتا تاپسىرۋدان كەيىن دە قاجەتتى بالل جينالماسا، بىلىكتىلىك ساناتى بەرىلمەيدى.

قايتا تەست تاپسىرۋدان باس تارتقان مۇعالىمدەر قىركۇيەكتە پيلوتتىق رەجيمدە ەنگىزىلەتىن جاڭا مودەل اياسىندا اتتەستاسياعا قاتىسا الادى.

پاندىك تەستتەن تەك قازىرگى مۇعالىمدەر عانا بوساتىلادى. ال جاقىندا عانا جوعارى وقۋ ورنىن بىتىرگەن جاس ماماندار ءۇشىن تەست تاپسىرۋ مىندەتتى بولىپ قالادى. ولار ەكى جىلدان كەيىن بۇل سىناقتى قايتا تاپسىرۋعا ءتيىس بولادى.

مۇعالىمدەردىڭ جۇكتەمەسى ازايادى

جاڭا ەرەجەلەر مۇعالىمدەر ءۇشىن قوسىمشا تالاپتاردى الىپ تاستايدى. ەندى ەسسە جازۋ، عىلىمي ماقالا جاريالاۋ، اۆتورلىق باعدارلامالار مەن وقۋ-ادىستەمەلىك ماتەريالدار ازىرلەۋ مىندەتتى بولمايدى. بۇل مۇعالىمدەردىڭ ۋاقىتىن ۇنەمدەپ، ءبىلىم بەرۋ پروسەسىنە كوبىرەك كوڭىل بولۋىنە مۇمكىندىك بەرەدى.

ومىر شىنىبەكۋلىنىڭ پىكىرىنشە، عىلىمي جۇمىستى مىندەتتى تالاپتاردان الىپ تاستاۋ – دۇرىس شەشىم. سەبەبى ءمۇعالىم – ەڭ الدىمەن پەداگوگ، عىلىمي قىزمەتكەر ەمەس.

اياتجان احمەتجان ۇلى بۇل پىكىرمەن كەلىسپەيدى. ونىڭ ويىنشا، ەسسە، عىلىمي ماقالالار، اۆتورلىق باعدارلامالار ءبىلىم ساپاسىنىڭ ماڭىزدى بولىگى سانالادى. ولاردى تولىق الىپ تاستاۋ سالاعا كەرى اسەر ەتۋى مۇمكىن. ساراپشى بۇل تالاپتاردى ەڭ جوعارى ساناتقا ۇمىتكەرلەر ءۇشىن قالدىرۋدى ۇسىنادى.

اشىق ساباقتار مەن پراكتيكالىق جۇمىس – باستى باعالاۋ كريتەرييى

جاڭا مودەلدە اشىق ساباقتار سانى مەن بىلىكتىلىك ساناتىن الۋ ءۇشىن قاجەتتى بىلىكتىلىكتى ارتتىرۋ ساعاتتارى قىسقارتىلادى. پەداگوگتىڭ پراكتيكالىق ناتيجەلەرىنە، جوبالارعا قاتىسۋىنا جانە تاربيەلىك قىزمەتىنە باسا نازار اۋدارىلادى.

ۆيسە-مينيستر شىنار اقپاروۆانىڭ ايتۋىنشا، جاڭارتىلعان ءتاسىل ءمۇعالىمنىڭ جۇمىسىن تەك اكادەميالىق كورسەتكىشتەر بويىنشا عانا ەمەس، وقۋشىلاردىڭ تۇلعالىق دامۋىنا قوسقان ناقتى ۇلەسى ارقىلى باعالاۋدى كوزدەيدى.

«پەداگوگ-مودەراتور» ساناتىنا قويىلاتىن تالاپتار قايتا قارالۋدا. بۇرىن جىلىنا بەس اشىق ساباق وتكىزۋ قاراستىرىلسا، ەندى اتتەستاسيا كەزەڭىندە بارلىعى ءتورت ساباق جەتكىلىكتى. سونىمەن قاتار، بىلىكتىلىكتى ارتتىرۋ كۋرستارىنىڭ كولەمى 72-دەن 36 ساعاتقا دەيىن قىسقارتىلادى.

وسىلايشا، باعالاۋدىڭ نەگىزگى كريتەرييلەرى ءمۇعالىمنىڭ مەكتەپ جوبالارى، شىعارماشىلىق توپتارعا قاتىسۋى، سىنىپ ساعاتتارىن وتكىزۋى جانە سىنىپتان تىس ءىس-شارالار بولادى.

ۆيسە-مينيستردىڭ ايتۋىنشا، «پەداگوگ-ساراپشى»، «پەداگوگ-زەرتتەۋشى» جانە «پەداگوگ-شەبەر» ساناتتارىنا دا وسىنداي وزگەرىستەر ەنگىزىلەدى.

«ۇستاز» پلاتفورماسى

بولاشاقتا قاعاز پورتفوليولاردى جيناۋ تاجىريبەسى تولىعىمەن الىنىپ تاستالىپ، جۇيە ەلەكتروندى فورماتقا كوشەدى. بىلىكتىلىك ساناتتارىنا اتتەستاسيا «ۇستاز» پلاتفورماسى ارقىلى جۇرگىزىلەدى. مۇعالىمدەر تۋرالى دەرەكتەر بىرنەشە مەملەكەتتىك دەرەكقوردان اۆتوماتتى تۇردە كەلىپ تۇسەدى: جۇمىس ورنى، ەڭبەك ءوتىلى، ءبىلىم دەڭگەيى جانە كاسىبي جەتىستىكتەرى ءبىر جۇيەدە جيناقتالادى. بۇل قاعازباستىلىقتى تولىعىمەن جويۋعا مۇمكىندىك بەرەدى.

ءقازىردىڭ وزىندە پلاتفورما مۇعالىمدەر تاراپىنان بەلسەندى قولدانىلۋدا. وتكەن جىلى اۆتوماتتاندىرىلعان جۇيەدە تەك «پەداگوگ-مودەراتور» جانە «پەداگوگ-ساراپشى» ساناتتارىنا اتتەستاسيا جۇرگىزىلدى. بولاشاقتا قالعان ساناتتاردى دا پلاتفورماعا كوشىرۋ جوسپارلانۋدا. ءبىر جىل ىشىندە «ۇستاز» ارقىلى 93،1 مىڭ ءمۇعالىم بىلىكتىلىك ساناتىن الۋعا ءوتىنىش بەردى.

مۇعالىمدەردىڭ بىلىكتىلىك ساناتىن الۋعا دەگەن ۇمتىلىسى تەك كاسىبي تالاپتارمەن عانا ەمەس، قوسىمشا تولەمدەرمەن دە بايلانىستى. ماسەلەن، «پەداگوگ-ماستەر» لاۋازىمىنا 50%، «پەداگوگ-زەرتتەۋشى» – 40%، «پەداگوگ-ساراپشى» – 35%، ال «پەداگوگ-مودەراتور» – 30% قوسىمشا اقى الادى.