InfoHub Logo

قازاقستان ەندى شيكىزاتتى شەتەلگە اعىل-تەگىل شىعارا بەرمەي، ونى ەل ىشىندە وڭدەپ، قوسىمشا قۇن جاساۋعا باسىمدىق بەرمەك. ۇكىمەتتىڭ جاڭا جوسپارى بويىنشا، مىس، اليۋمينيي سياقتى باعالى مەتالداردى تەرەڭىرەك وڭدەۋگە باعىتتالعان اۋقىمدى جوبالار قولعا الىنادى. بۇل ەل ەكونوميكاسىن ءارتاراپتاندىرىپ، جاڭا جۇمىس ورىندارىن اشۋعا جول اشادى.

بۇل تۋرالى Infohub.kz اقپارات اگەنتتىگى حابارلايدى.

مەتالل وڭدەۋگە باسىمدىق

جاقىندا دەپۋتاتتاردىڭ مەتاللۋرگيالىق شيكىزاتتى تەرەڭىرەك وڭدەۋ ماسەلەسىنە قاتىستى ساۋالىنا بەرگەن جاۋابىندا ۇكىمەتتىڭ بۇل باعىتتاعى جوسپارلارى ايقىن كورىندى. ەندى ەلدەن شيكىزاتتى از شىعارىپ، ونى قازاقستاندا وڭدەۋ كولەمىن ارتتىرۋعا باستى نازار اۋدارىلادى. بۇل ماقساتتا مەملەكەت بيزنەسكە قارجىلاي قولداۋ، ليزينگ، ونەركاسىپتىك گرانتتار ۇسىنىپ، جوبالاردى بىرلەسىپ قارجىلاندىرۋدى جولعا قويادى.

2022 جىلدان بەرى «بايتەرەك» حولدينگى ارقىلى وڭدەۋ ونەركاسىبىنە باعىتتالعان 118 جوباعا 539 ملرد تەڭگە قولداۋ كورسەتىلدى. ەگەر ارالاس قارجىلاندىرۋدى ەسەپتەسەك، جالپى كولەم شامامەن 748،8 ملرد تەڭگەگە جەتتى. ال 2026 جىلعا ارنالعان بيۋدجەتتە بۇل ماقساتتارعا قوسىمشا 329 ملرد تەڭگە قاراستىرىلعان.

شيكىزاتپەن قامتاماسىز ەتۋ جانە ەكسپورتتى رەتتەۋ

ۇكىمەت قازاقستاندىق زاۋىتتاردى شيكىزاتپەن قامتاماسىز ەتۋ ماسەلەسىن دە شەشۋدە. ول ءۇشىن شيكىزات وندىرۋشىلەر مەن وڭدەۋشىلەر اراسىندا كەلىسىمدەر جاسالىپ، ىشكى نارىقتىڭ قاجەتتىلىگى ەسكەرىلە وتىرىپ، شيكىزات ەكسپورتىنا ليسەنزيالاۋ ەنگىزىلەدى.

قازىرگى تاڭدا مىس، اليۋمينيي، مىرىش جانە قورعاسىنعا قاتىستى شامامەن 30 كاسىپورىننىڭ ءوتىنىمى قارالدى. ولاردىڭ قاتارىندا «قازقات زاۋىتى» ج ش س، «Alageum Cable Product» ج ش س، «قازاقستان ءاليۋمينييى» ج ش س، «Alutech» ج ش س جانە باسقالارى بار.

وڭدەۋشى كاسىپورىنداردىڭ مەتاللعا دەگەن سۇرانىسى ارتىپ كەلەدى. مىسقا دەگەن قاجەتتىلىك 2024 جىلعى 13 مىڭ توننادان 2026 جىلى 20،4 مىڭ تونناعا دەيىن ءوستى. اليۋمينييگە دەگەن سۇرانىس ودان دا ايقىن ءوسىم كورسەتتى – 54،1 مىڭ توننادان 77،7 مىڭ تونناعا دەيىن. ال مىرىش بويىنشا – 725 توننادان 2700-3000 تونناعا دەيىن.

جاڭا ونەركاسىپتىك كلاستەرلەر قۇرىلادى

ۇكىمەتتىڭ جاۋابىنداعى ەڭ قىزىقتى تۇسى – جاڭا ونەركاسىپتىك كلاستەرلەردى قۇرۋ جوسپارى. Qarmet-كە ۇقساس مودەل بويىنشا، بيلىك «Mineral Product International» ج ش س ارقىلى مەتاللۋرگيالىق كلاستەر قۇرۋدى كوزدەپ وتىر. جوبانىڭ العاشقى قادامى رەتىندە «ەكىباستۇز» يندۋستريالدى ايماعىندا فەرروقورىتپا زاۋىتى ىسكە قوسىلادى.

بۇل جوبا قازاقستاندىق شيكىزات پەن وڭىردەگى ارزان ەنەرگيانى پايدالانا وتىرىپ سالىنادى. بولاشاقتا بۇل جوبانى بولات ونىمدەرىن شىعارۋمەن، ياعني تەك قانا ءوندىرۋ جانە باستاپقى وڭدەۋمەن شەكتەمەي، ودان ءارى دامىتۋ جوسپارلانعان.

اليۋمينيي كلاستەرىن قوستاناي جانە پاۆلودار وبلىستارىندا «Kazakhstan Westerfield Mining»، «Kazakhstan Jingyum Aluminium Industries Limited» جانە «Kazakhstan Jinjiang Co.» كومپانيالارىنىڭ قاتىسۋىمەن دامىتۋ جوسپارلانۋدا. ۇكىمەت بۇل جوبالاردىڭ گلينوزەم مەن باستاپقى اليۋمينيي ءوندىرىسىن ارتتىرىپ، جۇمىس ورىندارىن اشىپ، ەكسپورتتى كەڭەيتىپ، ەل ىشىندە وڭدەۋدى كوبىرەك قالدىرۋعا كومەكتەسەتىنىنە سەنەدى.