InfoHub Logo

قاراعاندى قالاسىنداعى نازاربايەۆ زياتكەرلىك مەكتەبىنىڭ 10-سىنىپ وقۋشىسى ەۆگەنيا مەجەنينا بيولوگيادان وتكەن Open International Biology Olympiad (OIBO-2026) حالىقارالىق وليمپياداسىنىڭ قولا جۇلدەگەرى اتاندى. بۇل تۋرالى Infohub.kz اقپارات اگەنتتىگى حابارلايدى.

وليمپيادا رەسەيدەگى «سيريۋس» فەدەرالدى اۋماعىندا ءوتتى. وعان قازاقستان، تۇركيا، وڭتۇستىك افريكا، تايلاند سىندى 17 ەلدەن 100-دەن استام ۇزدىك جاس بيولوگ قاتىستى. OIBO بيولوگيادان ەڭ كۇردەلى حالىقارالىق وليمپيادالاردىڭ ءبىرى سانالادى. وندا قاتىسۋشىلار تەوريالىق ءبىلىمىن عانا ەمەس، تاجىريبەلىك زەرتتەۋ داعدىلارىن دا كورسەتە ءبىلۋى ءتيىس.

وليمپياداعا دايىندىق

ەۆگەنيانىڭ عىلىمي جەتەكشىسى، بيولوگيا ءپانى ءمۇعالىمى قارلىعاش جولدىبايەۆانىڭ ايتۋىنشا، وليمپياداعا دايىندىق بىرنەشە جىلعا سوزىلعان. ساباقتان تىس ۋاقىتتا كۇردەلى تاقىرىپتاردى تالداۋ، وليمپيادالىق ەسەپتەردى شەشۋ جانە قوسىمشا ادەبيەتتەردى وقۋمەن اينالىسقان. دايىندىق بارىسىندا زوولوگيا مەن بوتانيكادان باستاپ، بيوينفورماتيكا مەن ستاتيستيكاعا دەيىنگى بيولوگيانىڭ بارلىق باعىتتارى قامتىلعان.

«وليمپيادا تەك مەكتەپتەگى بيولوگيا ءبىلىمىن عانا ەمەس، سونىمەن قاتار حيميا، فيزيكا، ماتەماتيكا جانە ينفورماتيكا پاندەرىنەن دە جاقسى دايىندىقتى تالاپ ەتتى. اسىرەسە، لوگيكالىق ويلاۋ مەن ءبىلىمدى پراكتيكادا قولدانا ءبىلۋ ماڭىزدى بولدى»، - دەيدى ءمۇعالىم.

كۇردەلى تاپسىرمالار

OIBO-2026 باعدارلاماسى تەوريالىق تۋرلاردى، كۇردەلى زەرتحانالىق جۇمىستاردى جانە كوماندالىق زەرتتەۋ جوباسىن قامتىدى. تاجىريبەلىك كەزەڭدە قاتىسۋشىلار ناعىز زەرتتەۋشىنىڭ داعدىلارىن كورسەتۋى كەرەك بولدى. ەڭ قيىن تاپسىرمالاردىڭ ءبىرى – ءۇش ميلليمەتردەن از بولاتىن شىبىن ليچينكاسىن ميكروسكوپ ارقىلى زەرتتەۋ بولدى.

جوبالىق تۋردا قاتىسۋشىلار حالىقارالىق كوماندالارعا ءبولىنىپ جۇمىس ىستەدى. قازاقستان قۇراماسى قارا تەڭىزدىڭ زووپلانكتون بيوارتۇرلىلىگىن زەرتتەدى. وقۋشىلار جاعالاۋداعى سۋ سىنامالارىن جيناپ، سۋدىڭ لاستانۋىن كورسەتەتىن ميكروورگانيزمدەردىڭ تۇرلەرىن انىقتادى.

بولاشاققا جول

ەۆگەنيا مەجەنينانىڭ ايتۋىنشا، وليمپيادا تاپسىرمالارى ناقتى عىلىمي جۇمىستارعا جاقىن جانە زەرتتەۋ ناتيجەلەرى پراكتيكالىق ماڭىزعا يە بولۋى مۇمكىن. بۇل ونىڭ العاشقى جەڭىسى ەمەس. بۇعان دەيىن ول رەسپۋبليكالىق وليمپيادا مەن قازاقستان ءبىلىم وليمپياداسىنىڭ (قبو) جەڭىمپازى اتانعان. OIBO-2026 قولا مەدالى – بيولوگيادان الەمدەگى ەڭ بەدەلدى جارىس بولىپ سانالاتىن International Biology Olympiad (IBO) حالىقارالىق وليمپياداسىنا دايىندىقتاعى ماڭىزدى قادام بولدى.

«بۇل مەدال – IBO جولىنداعى ماڭىزدى قادام. حالىقارالىق جەڭىستەر ۇزدىك ۋنيۆەرسيتەتتەرگە تۇسۋدەن باستاپ، الەمدىك عىلىمي باعدارلامالارعا قاتىسۋعا دەيىنگى ۇلكەن مۇمكىندىكتەر بەرەدى»، - دەپ اتاپ ءوتتى قارلىعاش جولدىبايەۆا.