قازاقستاندا 1 ميلليون تەڭگە ايلىق قالاي الۋعا بولادى؟
قازاقستاننىڭ كەز كەلگەن وڭىرىندە تۇرىپ جوعارى ايلىق الۋعا بولادى. قالاي ەكەنىن ءقازىر بىلەسىز!
قازاق جاستارى ءۇشىن جوعارى جالاقىلى جۇمىسقا كىرۋ وتە ماڭىزدى ماسەلە. بۇعان قالاي قول جەتكىزۋگە بولادى؟
اقشا تابۋدىڭ بەلگىلى بىرنەشە جولدارى بار:
1. كاسىپكەرلىك نەمەسە ساۋدا.
2. ونەر. ءانشى، ءبيشى، كۇيشى بالاپان بولۋ.
3. سپورت. فۋتبول، بوكس، اۋىر اتلەتيكا ت.ب.
4. ايلىققا جۇمىس.
العاشقى 3 جول بويىنشا تابىس تابۋ مۇمكىندىگى بارلىعىندا جوق. سوندىقتان، ءبىز ايلىققا جۇمىس جاساۋ تۋرالى اڭگىمەلەسەتىن بولامىز.
كىم جانە نە ءۇشىن سىزگە اقشا تولەۋ كەرەك؟
جۇمىس بەرۋشى - جەكە كاسىپكەر كومپانيا، نەمەسە مەملەكەتتىك، بيۋدجەتتىك مەكەمە بولۋى مۇمكىن. جۇمىس بەرۋشىنىڭ پروبلەماسىن شەشكەنىڭىز ءۇشىن سىزگە اقشا تولەيدى.
مىسالى، مەملەكەتتىك مەكتەپ ءۇشىن - 5 - سىنىپ وقۋشىلارىن ماتەماتيكا پانىنە ۇيرەتۋ ماسەلەسى بار، وسى ماسەلەنى شەشۋگە ماتەماتيك مامانىنا كەلىسىلگەن اقشانى بەرىپ وتىرادى. ءدال سول سياقتى، رەستوران - تاماق تاسۋ ماسەلەسىن، داياشىعا اقشا تولەۋ ارقىلى، اياق كيىم ساتاتىن دۇكەن - تاۋارلاردى ادامدارعا بەرىپ ولاردان اقشا الۋ ماسەلەسىن، ساتۋشىعا اقشا تولەۋ ارقىلى شەشەدى. ويدىڭ باعىتىن تۇسىنگەن شىعارسىزدار.
قىسقاسى، ايلىق بەلگىلى ءبىر اتقارىلعان جۇمىس، ياعني شەشىلگەن ماسەلە ءۇشىن تولەنەدى. ماسەلە قانشالىقتى قيىن بولعان سايىن، ونى شەشۋگە سونشالىقتى كوپ اقشا تولەنەدى. سايكەسىنشە، قيىن ماسەلەلەردى شەشەتىن ادامداردىڭ جالاقىسى، جەڭىل ماسەلە شەشەتىندەردىكىنەن جوعارى بولادى.
جۇمىستاردىڭ تۇرلەرى وتە كوپ، ءبىراق ولاردى جۇمىس جاساۋ قۇرالىنا قاراي بولۋگە بولادى:
1. كۇشپەن، دەنەمەن شەشىلەتىن ماسەلەلەر.
2. ميمەن، اقىلمەن شەشىلەتىن ماسەلەلەر.
"بىلەكتى ءبىردى جىعادى، ءبىلىمدى مىڭدى جىعادى" دەگەن ماقالدى ءبارىمىز ەستىگەمىز عوي. وسى قاعيدا قازىرگە دەيىن وزەكتى.
ارينە، داياشى بولىپ، كۇزەتشى بولىپ، تاكسي جۇرگىزىپ تە جاقسى اقشا تاۋىپ جۇرگەندەر بار شىعار، ءبىراق، كوپشىلىك جاعدايدا ميمەن جۇمىس جاسايتىن ادامدار، كۇشپەن جۇمىس جاسايتىندارعا قاراعاندا كوبىرەك اقشا تابادى.
باكە، ساكە، تانىس ارقىلى جۇمىسقا كىرۋ جولىن قاراستىرمايمىز. سەبەبى، كوپ جاعدايدا بۇل از جالاقىلى، مەملەكەتتىك جۇمىس. ول جەردە ءسىزدىڭ ماسەلە شەشكەنىڭىز ەشكىمگە كەرەك ەمەس، ارى كەتسە بارىپ كەل، شاۋىپ كەلمەن اينالىساسىز.
اكىمدىككە كىرىپ، بىرەر ۋاقىتتان سوڭ ادامداردان پارا الۋ، مەملەكەتتىك قازىنادان جىمقىرىپ قالۋ جولىن دا قاراستىرمايمىز. سەبەبى، بۇنداي ارسىزدىققا بارعاننان، جۇمىسسىز اشتان ولگەن ارتىق دەپ ەسەپتەيمىن.
بىزگە بەلگىلى ءبىر سالانى ۇيرەنىپ، وسى سالادا ءوز وي-سانامىزدى پايدالانىپ، ادال اقشا تابۋ نۇسقاسى قىزىق. كوپ اقشا تابۋ.
ول قانداي سالا بولۋى مۇمكىن؟ مىسالى، ءسىز اعىلشىن ءتىلىن جاقسى بىلەسىز دەيىك. قۇجاتتاردى اۋدارۋمەن اينالىساتىن مەكەمەگە جۇمىسقا كىرۋگە بولادى. زاڭدى جاقسى بىلسەڭىز، نوتاريۋس بوپ، سوت ورىنداۋشىسى بولىپ نەمەسە كونسۋلتانت بولىپ جۇمىسقا كىرۋگە بولادى. بۇنداي مىسالدار وتە كوپ. ءبىراق، بۇل سالالاردا سىزدەن جوعارى وقۋ ورىنىن بىتىرگەن ديپلوم تالاپ ەتۋى مۇمكىن.
ال ديپلومسىز، تانىسسىز، ۇلكەن ەڭبەك ءوتىلىسىز، قولمەن ەمەس ميمەن جۇمىس ىستەيتىن، باسقا قالاعا بارماي، ءوز تۇرعىلىقتى جەرىندە ىستەيتىن، وسىنىڭ بارلىعىنا قوسا جوعارى ايلىق الاتىن جۇمىس تابۋعا بولا ما؟
بولادى. وسى جەردە ماقالانىڭ ەڭ قىزىق جەرىنە دە كەلىپ جەتتىك.
پروگرامميست - بولاشاقتىڭ ماماندىعى! كەز-كەلگەن ادام پروگرامميست بولا الادى. ءيا، كەز-كەلگەن. ءقازىر الەمدە پروگرامميستەردىڭ ۇلكەن تاپشىلىعى بايقالۋدا. ءوز ەلىندە جۇمىسشى تابا الماعان كومپانيالار، شەت ەلدەردەن، قاشىقتىقتا جۇمىس ىستەيتىن پروگرامميستەردى جۇمىسقا الادى. ءقازىر ءۇندىستاننىڭ حالقى جۇمىسسىزدىقتىڭ ەسەسىنەن پروگرامميست ماماندىعىن جاپپاي ۇيرەنىپ، قاشىقتىقتان جۇمىس جاساپ ءجۇر. ۋكراينا، بەلارۋس ەلدەرىندە دە مۇنداي ترەند كوپ بايقالادى. الەمدەگى ەڭ جىلدام دامىپ جاتقان ازيا بارىسىنىڭ ءبىرى، سينگاپۋر ەلى، وسى جولمەن بۇكىل ەلدىڭ ەكونوميكاسىن كوتەرىپ وتىر.
قازاقستاننىڭ وزىندە پروگرامميستەر تاپشىلىعى وتە ۇلكەن دارەجەدە. ورتاشا بىلەتىن مامانداردىڭ جالاقىسى 400 مىڭ تەڭگەدەن باستالادى. ەندى جۇمىس باستاپ جۇرگەن پروگرامميستەر كەمىندە 100-150 مىڭ تەڭگە جالاقى الا الادى. سوزىمە سەنبەسەڭىز، ەلىمىزدەگى باستى جۇمىس تابۋ سايتى hh.kz سايتىنا كىرىپ قاراپ كورىڭىزدەر.
ارينە، ءبىر مەزەتتە باس سالىپ پروگرامميست بوپ كەتە سالۋ مۇمكىن ەمەس. وعان دايىندالۋ كەرەك، دۇرىس قادامدار جاساۋ كەرەك.
قورىتىندىلاساق، ماسەلە بىلاي:
پروگرامميست ماماندىعى جايلى، قانداي تۇرلەرى بار ەكەندىگى، قالاي مەڭگەرۋگە بولاتىنى جانە جۇمىسقا كىرۋ ءۇشىن نە ىستەۋ كەرەكتىگى جايلى اقپارات جيناۋ كەرەك.
ءبىر باعىتتى تاڭداپ، سول بويىنشا 2 ايدان - 6 ايعا دەيىن وقىپ دايىندالۋ كەرەك.
قالادا تۇراتىن بولساڭىز، junior پروگرامميست بولىپ جۇمىسقا كىرۋ كەرەك. باسىندا 1 اي تەگىن جۇمىس جاساۋىڭىز دا مۇمكىن.
جارتى جىلداي junior بولىپ 100-150 مىڭ تەڭگەگە جۇمىس جاساساڭىز، سوسىن middle(ورتاشا دارەجە) دارەجەسىنە قالاي جەتكەنىڭىزدى ءوزىڭىز بايقاماي قالاسىز.
Middle پروگرامميست بولىپ، 500 مىڭ تەڭگەدەن ارتىق ايلىق الىپ جۇرگەن كوپ پروگرامميست دوستارىم بار. ال بۇل دارەجەدەگى پروگرامميست، ءوز جۇمىسىمەن قاتار، قوسىمشا جۇمىستار الىپ، تاعى قوسىمشا 150-200 مىڭ تەڭگە ايىنا تابا الادى. سوندا، ىنتامەن ەڭبەكپەن كىرىسكەن جاعدايدا جارتى جىلدىڭ وزىندە 700 مىڭ تەڭگەگە ايلىققا جۇمىس ىستەۋگە بولادى.
ارينە، اركىمنىڭ قابىلەتى، ىنتاسى، تالپىنىسى ءارتۇرلى. 700 مىڭ ەمەس 300 مىڭ بولعاننىڭ ءوزى وتە جاقسى ەمەس پە؟ جارتى جىل پروگرامميست بولعان ادام، ءارى قاراي ۇزدىكسىز دامىپ وتىرادى. ءارى قاراي Senior دارەجەسىنە جەتىپ، 1 ميلليون تەڭگەدەن اسىپ ءتۇسۋ تەك ۋاقىت ماسەلەسى.
ەگەر اۋىلدا تۇراتىن بولساڭىز، ينتەرنەت ارقىلى ءبىلىم جينايسىز. فريلانس (قاشىقتىقتان ىستەيتىن) جۇمىستار وتە كوپ. 5-6 اي بويى فريلانستا جۇمىس جاساپ تاجىريبە ارتتىراتىن بولساڭىز، middle دارەجەسىنە جەتكەندە بەلگىلى ءبىر كومپانياعا ۇيدەن وتىرىپ جۇمىس جاسايتىن بولىپ، ءاردايىمعى جۇمىسقا ورنالاسساڭىز بولادى.
جوعارىدا ايتىلعاننىڭ ءبارى بار نارسە، بولاتىن نارسە. ءوزىم اۋىلدىڭ قارا بالاسىمىن. كوپ بالالى وتباسىدا دۇنيەگە كەلدىم. ءمۇعالىم مەن دارىگەردىڭ بالاسىمىن. قازاق سىنىبىن ءبىتىردىم. پروگرامميست ماماندىعىنا وقىمادىم، بارلىعىن ينتەرنەت ارقىلى ءوزىم ۇيرەندىم. قازىردە بىرىككەن ۇلتتار ۇيىمىنىڭ بەرگەن تاپسىرى بويىنشا مۇگەدەكتەردى قولداۋعا ارنالعان ينتەرنەت جۇيە جاساۋمەن اينالىسىپ جاتىرمىن. ۇلكەن كومپانيادا جۇمىس جاسايمىن. ايلىعىم وتە جاقسى)
تالپىنىسى جوق ادام سىلتاۋ ىزدەيدى. ميىن قوزعاماعان ادام سترويكادا بەلىن قوزعايدى. ەگەر سىزگە انىق پروگرامميست بولۋ قىزىق بولسا، ءوز ءومىرىڭىزدى جاقسى جاعىنا وزگەرتكىڭىز كەلسە، سۇراقتارىڭىزدى قويساڭىز بولادى. بارىنشا كەڭەس بەرۋگە، باعىت-باعدار بەرۋگە تىرىسامىن. نازارلارىڭىزعا راقمەت!
ەستەرىڭىزدە بولسىن، "وقۋ - ءبىلىم بۇلاعى، ءبىلىم - ءومىر شىراعى"!
You Might Also Like
-
جامبىل وبلىسى شۋ اۋدانى اكىمدىگىنىڭ ءبىلىم ءبولىمىنىڭ «ەڭبەكشى ورتا مەكتەبى» كمم-نىڭ ديرەكتورى مايكەيەۆ تالاپ جىلىسوۆيچ
