InfoHub Logo

قازاقستاندا سيىر ەتىنەن ءۇش ەسە ارزان ەتتىڭ جاڭا ءتۇرى پايدا بولدى. بۇل – سايعاق ەتى. ەندى بۇل جانۋاردىڭ ەتى رەسمي تۇردە ساۋدا جەلىلەرى مەن ارنايى نارىقتاردا ساتىلا باستادى.

بۇل تۋرالى Infohub.kz اقپارات اگەنتتىگى حابارلايدى.

رەگۋلياسيادان وندىرىسكە دەيىن

سايعاق ەتىنەن جاسالعان كونسەرۆىلەر 2025 جىلدىڭ قاڭتارىنان باستاپ دۇكەن سورەلەرىندە پايدا بولسا، جاز ايلارىندا سالقىنداتىلعان تۋشالاردى ارنايى ساتۋ ورىندارىندا ساتۋ جۇمىستارى جانداندى. ءسويتىپ، دالا انتيلوپاسى پوپۋلياسياسىن باسقارۋ پروسەسى تولىققاندى وندىرىستىك مودەلگە اينالدى.

بۇل رەتتەۋ جۇمىستارىن ەكولوگيا مينيسترلىگى جانىنداعى «وحوتزووپروم» رمقك قىزمەتكەرلەرى مەن ساۋدا مينيسترلىگىنىڭ تەحنيكالىق رەتتەۋ جانە مەترولوگيا كوميتەتى باقىلايدى. 2025 جىلى 35 ليسەنزيالانعان سويۋ وبەكتىسىنىڭ 27ء-سى جۇمىسقا تارتىلدى. ولار ەلىمىزدىڭ جەتى وڭىرىندە ورنالاسقان:

بارلىق نىساندار ۆەتەرينارلىق-سانيتارلىق تالاپتارعا سايكەستىگى بويىنشا تەكسەرىلىپ، سويۋ سەحتارىمەن، مۇزداتقىش كامەرالارمەن جانە سۋمەن جابدىقتاۋ جۇيەلەرىمەن جابدىقتالعان.

ساتىلىم الدىنداعى تەكسەرۋلەر

جابايى جانۋار ەتىنىڭ قاۋىپسىزدىگى – ەڭ ماڭىزدى ماسەلە. اۋىل شارۋاشىلىعى مينيسترلىگىنىڭ مالىمەتىنشە، سويۋ وبەكتىلەرىنە 196 120 باس سايعاق ەتى تۇسكەن. ءاربىر تۋشا مىندەتتى تۇردە تەكسەرۋدەن وتەدى.

ىشكى ورگاندار مەن باستىڭ ورگانولەپتيكالىق تەكسەرىسى، ليمفا بەزدەرىنىڭ اشىلۋى جۇرگىزىلەدى. سونداي-اق، قايناتۋ سىناعى، فيننوز (سيستيسەركوز) بويىنشا زەرتتەۋ جانە جالپى رادياسيالىق فوندى انىقتاۋ مىندەتتى بولىپ سانالادى. ەل ىشىندە بارلىعى 137 381 تۋشا ساتىلدى. بۇل ونىمگە شىعۋ تەگى مەن قاۋىپسىزدىگىن راستايتىن 1729 ۆەتەرينارلىق انىقتاما بەرىلگەن.

«وحوتزووپروم» رمقك-دان سەرىكتەس كاسىپورىنداردىڭ ەت ساتىپ الۋ باعاسى جاريالانبايدى. بۇل مالىمەتتەر كوممەرسيالىق قۇپيا بولىپ سانالادى. الايدا، بولشەك ساۋدا باعالارى جاريالانعان.

2026 جىلدىڭ باسىنداعى مالىمەت بويىنشا، ءبىر كيلوگرامم سايعاق ەتىنىڭ باعاسى 1300-2400 تەڭگە ارالىعىندا. ەڭ كوپ سۇرانىسقا يە سەگمەنت – 1600-1800 تەڭگە. سالىستىرار بولساق، كەيبىر وڭىرلەردە سيىر ەتىنىڭ باعاسى كيلوگرامىنا 4000 تەڭگەدەن اسادى.

«ۆەتەريناريا تۋرالى» زاڭنىڭ 22-بابىنا سايكەس، جانۋار تەكتەس ونىمدەردى ساراپتاماسىز ساتۋعا تىيىم سالىنعان. رەسمي نارىقتار مەن دۇكەندەردە مەملەكەتتىك ينسپەكتورلار كۇندەلىكتى ۆەتەرينارلىق انىقتاما مەن سويۋ وبەكتىسىنىڭ ءمورىنىڭ بار-جوعىن، تاسىمالداۋ كەزىندەگى تەمپەراتۋرالىق رەجيمنىڭ ساقتالۋىن، سونداي-اق زەرتحانالىق زەرتتەۋلەردىڭ ناتيجەلەرىن تەكسەرەدى.

سالالىق كوميتەت سايعاق ەتىن تەك ارنايى بەلگىلەنگەن ورىنداردان ساتىپ الۋعا جانە ىلەسپە قۇجاتتاردى تالاپ ەتۋگە كەڭەس بەرەدى.

تەرى جانە ەكسپورت

ەتتەن بولەك، مەملەكەت جاناما شيكىزاتتى دا پايدالانۋدى جوسپارلاپ وتىر. قازاقستاندا جىل سايىن 3،3 ميلليون ءىرى قارا مال تەرىسىن وڭدەۋگە قابىلەتتى 11 كاسىپورىن جۇمىس ىستەيدى. ولاردىڭ تەحنيكالىق بازاسى سايعاق تەرىسىن دە وڭدەي الادى.

سونىمەن قاتار، سىرتقى نارىقتاردى اشۋ بويىنشا جۇمىستار جۇرگىزىلۋدە. اۋىل شارۋاشىلىعى مينيسترلىگى جۇڭگو، سينگاپۋر، مالايزيا، ۆەتنام جانە جاپونيانىڭ ۆەتەريناريالىق قىزمەتتەرىنە ءتىرى سايعاقتاردى، ولاردىڭ بولىكتەرى مەن تۋىندىلارىن، سونىڭ ىشىندە مۇيىزدەرىن يمپورتتاۋ تالاپتارىن الۋ ماقساتىندا رەسمي ساۋالدار جولدادى.

بۇل تالاپتار الىنعاننان كەيىن مينيسترلىك ەكسپورتقا ارنالعان ۆەتەرينارلىق سەرتيفيكاتتاردى كەلىسۋ ءراسىمىن باستاۋدى جوسپارلاپ وتىر. ناتيجەلەرى تۋرالى سىرتقى ەكونوميكالىق قىزمەتكە قاتىسۋشىلارعا قوسىمشا حابارلاناتىنى ايتىلدى.

ناتيجەسىندە، سايعاقتار سانىن رەتتەۋ جونىندەگى باستاما ىشكى نارىقتا جاڭا تاۋار ساناتىنا اينالدى. ەندىگى باستى سۇراق – قازاقستاندىقتار ادەتتەگى سيىر ەتىنە بالاما رەتىندە ارزان نۇسقانى تاڭداۋعا دايىن با؟