InfoHub Logo

گەرمانيا، ۇلىبريتانيا، فرانسيا جانە ۋكراينا باسشىلارى لوندونداعى كەزدەسۋدە ۋكراينادا ءادىل ءارى تۇراقتى بەيبىتشىلىككە قول جەتكىزۋ ءۇشىن بەس شارتتى اتاپ ءوتتى. بۇل تۋرالى DW اگەنتتىگىنە سىلتەمە جاساپ Tengrinews.kz حابارلايدى.

فريدريح مەرس، كير ستارمەر، ەممانيۋەل ماكرون جانە ۆلاديمير زەلەنسكيي لوندون كەزدەسۋىندە بىرلەسكەن مالىمدەمە جاساپ، ونى جەكسەنبى، 7 ماۋسىمدا بريتان ۇكىمەتىنىڭ سايتىندا جاريالادى.

ولار كييەۆ پەن ماسكەۋ اراسىنداعى بەيبىت كەلىسسوزدەرگە ەۋروپالىق ەلدەردىڭ «بەلسەندى قاتىسۋى» قاجەتتىگىن مالىمدەدى.

كەزدەسۋ بارىسىندا رەسەي ەكونوميكاسىنا قىسىمدى كۇشەيتۋ، ۋكرايناعا اسكەري كومەكتى ارتتىرۋ، اۋە قورعانىسى مەن قاشىقتان سوققى جاساۋ ءۇشىن قاجەتتى زىمىرانداردى بىرلەسىپ ءوندىرۋ ماسەلەلەرى تالقىلاندى.

كەزدەسۋگە قاتىسۋشىلاردىڭ پىكىرىنشە، ۋكراينادا تۇراقتى بەيبىتشىلىك ورناتۋدىڭ بەس شارتى:

ءبىرىنشى شارت – قاقتىعىستاردى توقتاتۋ.

ەكىنشى شارت: قازىرگى بايلانىس جەلىسى كەلىسسوزدەر ءۇشىن باستاپقى نۇكتە بولۋى ءتيىس.

«حالىقارالىق شەكارالار كۇشپەن وزگەرتىلمەۋى كەرەك، ال ۋكراينانىڭ ءوزىنىڭ قاۋىپسىزدىگىن قامتاماسىز ەتۋ جانە وداقتاردى تاڭداۋ تەتىكتەرىن دەربەس انىقتاۋ قۇقىعى قاتاڭ ساقتالۋى ءتيىس»، - دەلىنگەن بىرلەسكەن مالىمدەمەدە.

ءۇشىنشى شارت – بىتىمگەرشىلىك رەجيمى كۇشىنە ەنگەننەن كەيىن ۋكرايناعا قاۋىپسىزدىك كەپىلدىكتەرى بەرىلۋى كەرەك، ونىڭ ىشىندە ۋكراينادا كوپۇلتتى كۇشتەردىڭ ورنالاستىرىلۋى بار.

«تورتىنشىدەن، رەسەي اگرەسسيالىق سوعىستى توقتاتىپ، سوعىس كەزىندە كەلتىرىلگەن زالالدى وتەمەگەنشە، رەسەيلىك اكتيۆتەر بۇعاتتاۋلى قالادى»، - دەلىنگەن مالىمدەمەدە.

اقىرىندا، بەسىنشى شارت – كەز كەلگەن كەلىسىم ەۋروپالىق قاۋىپسىزدىك مۇددەلەرىن قامتاماسىز ەتۋى كەرەك. ەۋروپا وداعى مەن ناتو-عا قاتىستى كەلىسسوزدەر بولىگى ەو ەلدەرى مەن سولتۇستىكاتلانتيكالىق اليانس وداقتاستارىنىڭ كەلىسىمىن تالاپ ەتەدى.

ەستەرىڭىزگە سالا كەتەيىك، بۇعان دەيىن ۋكراينا پرەزيدەنتى رەسەي پرەزيدەنتى ۆلاديمير پۋتينگە جولداعان اشىق حاتىندا سوعىستى توقتاتىپ، ولاردىڭ جەكە كەزدەسۋىنىڭ «ناقتى كۇنىن» بەلگىلەۋدى ۇسىنعان بولاتىن. ول سونداي-اق «ەكىجاقتى ترەككە» باسقا قاتىسۋشىلار – ەۋروپا مەن اقش قوسىلۋى مۇمكىن ەكەنىن اتاپ ءوتتى.

زەلەنسكييدىڭ حاتىنا جاۋاپ رەتىندە پۋتين كەلەسى كۇنى ولاردىڭ كەزدەسۋىنىڭ «ءمانىن كورمەيتىنىن» مالىمدەدى. كرەمل باسشىسى حاتتى «ادەپسىزدىك ەلەمەنتتەرى» مەن «مۇمكىن كەزدەسۋگە كەدەرگى كەلتىرەتىنىن» ايتىپ، «سوعىس اياقتالادى، جانە ءبىز (رەسەي. - رەد.) قويىلعان ماقساتتارعا جەتىپ، ونى اياقتايمىز» دەپ مالىمدەدى.