InfoHub Logo

كييەۆتە قازاقستان مەن ۋكراينانىڭ قۇقىق قورعاۋ ورگاندارى ەسىرتكى ساتۋشىلاردى تارتۋمەن اينالىسقان call-ورتالىقتار جەلىسىن جويدى. بۇل تۋرالى ق ر ىشكى ىستەر مينيسترلىگىنىڭ باسپا ءسوز قىزمەتى حابارلادى.

بۇل تۋرالى Infohub.kz اقپارات اگەنتتىگى حابارلايدى.

بىرلەسكەن جەدەل-تەرگەۋ ءىس-شارالارى بارىسىندا ەكى ەلدىڭ پروكۋراتۋرالارىمەن ءوزارا ءىس-قيمىل ارقىلى قازاقستان ىشكى ىستەر مينيسترلىگى مەن ۋكراينانىڭ ۇلتتىق پوليسياسى ترانسناسيونالدىق قىلمىستىق توپتاردى پايدالانعان call-ورتالىقتاردىڭ ۇيىمداستىرۋشىلارى مەن قاتىسۋشىلارىن انىقتادى.

ەسىرتكى بيزنەسىنە جاستاردى تارتقان

«28 مامىردا كييەۆ قالاسىندا ەۋروپا مەن تمد ەلدەرىندە سينتەتيكالىق ەسىرتكى ءوندىرۋ جانە ساتۋمەن اينالىساتىن ترانسناسيونالدىق قىلمىستىق ۇيىمداردىڭ بىرىنە باعىنىشتى call-ورتالىقتاردىڭ قىزمەتى توقتاتىلدى»، - دەدى ق ر ءىىم ەسىرتكى قىلمىسىنا قارسى كۇرەس كوميتەتى ءتوراعاسىنىڭ ورىنباسارى ەلدار ابدىكەنوۆ.

ونىڭ ايتۋىنشا، call-ورتالىقتار ارقىلى قازاقستان اۋماعىندا ەسىرتكىنى تاراتۋشى (زاكلادچيك) جانە ءبۋىپ-تۇيۋشى رەتىندە جۇمىس ىستەۋگە ازاماتتاردى تارتقان.

ۇستالعاندار مەن تاركىلەنگەن زاتتار

«جۇرگىزىلگەن ءىس-شارالار ناتيجەسىندە 11 ادام ۇستالدى. قىلمىستىق سحەمانىڭ ءاربىر قاتىسۋشىسىنىڭ، سونىڭ ىشىندە ۇيىمداستىرۋشىلاردىڭ، اعا وپەراتورلاردىڭ جانە تىكەلەي ادام تارتۋمەن اينالىسقان كەڭسە قىزمەتكەرلەرىنىڭ رولدەرى انىقتالدى»، - دەدى ابدىكەنوۆ.

پوليسەيلەر توعىز مەكەنجاي بويىنشا ءتىنتۋ جۇرگىزىپ، شامامەن 40 مىڭ اقش دوللارى مەن 10 مىڭ ەۋرو، Range Rover اۆتوكولىگى، 18 ۇيالى تەلەفون، 12 نوۋتبۋك پەن پلانشەت تاركىلەدى.

«قازىرگى ۋاقىتتا تاركىلەنگەن كومپيۋتەرلىك تەحنيكالاردان اقپاراتتى شىعارۋ جانە تالداۋ جۇمىستارى جۇرگىزىلۋدە، قىلمىستىق ارەكەتتەردى ۇيىمداستىرۋشىلاردىڭ اككاۋنتتارى انىقتالۋدا، سونداي-اق قارجىلىق تەرگەۋ دە ءجۇرىپ جاتىر»، - دەپ حابارلادى ەلدار ابدىكەنوۆ.

ىشكى ىستەر مينيسترلىگى بۇل call-ورتالىقتاردىڭ جويىلۋى قازاقستان ازاماتتارىنىڭ ەسىرتكى اينالىمىنا قاتىستى قىلمىستىق ارەكەتتەرگە تارتىلۋىن ايتارلىقتاي ازايتاتىنىن جانە حالىقارالىق ەسىرتكى بيزنەسىن ۇيىمداستىرۋشىلاردى انىقتاپ، جاۋاپقا تارتۋعا مۇمكىندىك بەرەتىنىن اتاپ ءوتتى.