InfoHub Logo

Muǵalimder kúni qarsańynda S. Seıfýllın atyndaǵy qazaq agrotehnıkalyq ýnıversıtetiniń jas ǵalymdaryna, doktoranttary men magıstranttaryna jańa baspanalardyń kiltin tabystaý saltanaty ótti, dep habarlaıdy astana.gov.kz.

Sharaǵa Astana qalasy ákiminiń orynbasary Andreı Lýkın, «S.Seıfýllın atyndaǵy Qazaq ATÝ» AQ Basqarma tóraǵasy Aqylbek Kúrishbaev qatysty.

Elorda ákiminiń orynbasary Andreı Lýkın óz sózinde Memleket basshysy halyqty baspanamen qamtýǵa basa nazar aýdaratynyn atap ótti. Búgingi tańda Astanada turǵyn úımen qamtamasyz etý bir adamǵa shaqqanda 29 sharshy metrge jýyqtady, jyl saıyn 2 mln sharshy m jýyq turǵyn úı tapsyrylady.

«Baspanaly bolǵandardy quttyqtaımyn! Qazaq agrotehnıkalyq ýnıversıtetinde osyndaı dástúr qalyptasqan, bul elimizdegi úzdik joǵary oqý oryndarynyń biri. Merdigerlerimiz rekordty qysqa ýaqyttyń ishinde - 10 aıda ádemi úıler salyp bitirdi. 120 adam qonys toıyn toılaıdy. Bul qalanyń ortalyq bólikteriniń biri. Munda balanyń syńǵyrlaǵan kúlkisi estilip, aqsaqaldarymyz demalady, al eń bastysy, bul ǵylymmen, shyǵarmashylyqpen, jastarymyzdy tárbıeleýmen aınalysýdy jalǵastyrýǵa yntalandyrady. Barshańyzǵa baqyt pen kóterińki kóńil-kúı tileımin», - dedi A. Lýkın.

Elorda ákimdiginiń qoldaýymen ýnıversıtettiń jas oqytýshylary, doktoranttary men magıstranttary úshin Esil ózeniniń sol jaǵalaýynda 120 páterlik úsh besqabatty úı boı kóterdi. Akademıalyq mobıldilik baǵdarlamasy aıasynda shetelde taǵylymdamadan ótken jas oqytýshylarǵa jáne «Bolashaq» halyqaralyq baǵdarlamasynyń stıpendıattaryna páter kiltteri tabystaldy.

---