InfoHub Logo

Bilim berý salasynda 60-tan astam memlekettik qyzmet elektrondy túrde qoljetimdi. Bul týraly QR Bilim jáne ǵylym vıse-mınıstri Rústem Bıǵarı aıtyp berdi.

«Bilim berý júıesinde 67 qyzmet elektrondy túrde qoljetimdi. Máselen, qazirgi ýaqytta joǵarǵy oqý ornyna qujat tapsyrý qıyn jumys bolyp kórinedi. 2020 jyldan bastap onyń qajeti bolmaıdy, sebebi jyl sońyna deıin barlyq aqparat sıfrlanady. «Kúndelik» júıesindegi derekter avtomatty túrde JOO-ǵa beriledi, sáıkesinshe qujattardy qaıta tapsyrý qajet emes. Jalpy, mektepter men balabaqshalardaǵy oqý prosesi avtomattandyrylǵan», — dedi Rústem Bıǵarı búgin Astana Hub tehnoparkinde áleýmettik ınovasıalar zerthanasynyń ashylýynda.

Sonymen birge, Sıfrlyq damý, ınovasıalar jáne aeroǵaryshtyq ónerkásip vıse-mınıstri Abylaıhan Ospanov memlekettiń balalarǵa qatysty qyzmetterdi kóbirek usynyp jatqanyn jetkizdi.

«Ótken jyly SMS-habarlama arqyly jańa týǵan sábıge at qoıyp, týý týraly kýálik alý qyzmetin iske qostyq. Eshqaıda barýdyń qajeti joq. Elektrondy qyzmetterdiń basym bóligi balalarǵa kórsetilýi tıis», — dedi Abylaıhan Ospanov.

Aıta keteıik, Astana Hub halyqaralyq IT-startaptar tehnoparki men BUU Balalar qory (IýNISEF) balalar múddesin qorǵaıtyn «Social Innovation» áleýmettik ınovasıalar zerthanasyn ashty. Onyń qyzmeti zamanaýı tehnologıalar arqyly balalardy túrli syn-qaterden qorǵaıtyn jobalardy júzege asyrýǵa baǵyttalǵan.

---