InfoHub Logo

Qyz balasy-egemen elimizdiń, janǵa shıpa, dertke daýa saıyn dalamyzdyń qundy qazynasy ispettes.Jan dúnıesiniń ásemdigi jaıynda syr shertetin qaraqat kózi, qolań shashy, keskin-kelbeti, syńǵyrlaǵan ári unamdy úni, aqyl-oıynyń tereńdigin aıqyndaı túsetin adamgershilik qasıetterimen daralanatyn názik jandylardyń kindik qany tamǵan jeri úshin árdaıym "qylyqty arý" bolyp qalatyny haq.Sodan bolar, dana halqymyzda:"Qyz-eldiń kórki" degen astarly sózdiń beleń alýy.

Kúlli álem jaratylǵannan bastap, ómir atty uzaq saparda san qıly aýyrtpalyqtarǵa kezdesip, sanasynyń tereńdigine boılap, tabıǵatynan berilgen bar jigerin jıyp, kúrmeýi sheshilmes kúresterdi jeńgen  keıbir ójet qyzdarymyzdyń kórgen qorlyqtaryn kóz aldyńyzǵa elestetseńiz-janyńyz túrshigedi.Árıne, qazir ǵumyrymyzǵa jańa lep pen jańa tynys syılaıtyn zaman, básekelestik ǵasyry.Alaıda, shynaıy baqytqa kenele almaǵan keıbir qara kózdilerimizdiń bastan keshken oqıǵalaryn tilge tıek etkenimiz jón bolar.

Jaqynda qoǵamymyzda jaǵaustatarlyq jaıttar oryn aldy.Júrdek poıyz arqyly dittegen jerine jetpek bolǵan Qazaqstan azamatshysyna jolserikter túrli qoqan-loqy kórsete otyryp, azaptaǵan.Táni ǵana emes, jany jaralanǵan jábirlenýshi qandastarynan jazany kúsheıtýdi ári ózgelerden qyz ómirin ókinishke toltyrar dál osyndaı qylmystardyń qaıtalanbaýyn ótinip otyr.Bul-baqytsyzdyqqa dýshar bolǵan boıjetkenniń ashshy zary ǵana.Al, mundaı mashaqatpen kúrese almaı, qapyda qalǵan talaı qazaq qyzdarynyń taǵdyry jaıly ne demekpiz?! Kúızeliske túsip, bar dármenimen basqa túsken qıynshylyqtarmen kúres júrgizse de, óz ortasynda keýdesin tik kóterip, baıandy ǵumyr keshe ala ma? Sirá,týyndaǵan tolassyz suraqtardyń sheshimin taba almaspyz.

Osydan birneshe aı buryn áleýmettik jeliden 9-10 jastar shamasyndaǵy beıkúná perishteniń dál osyndaı hálge dýshar bolǵanyn kórdim.Aq pen qaranyń ne ekenin bilmeıtin, myna álemnen meıirim kútken balapanǵa jasalynǵan aıýandyqtan habardar bolǵannan keıin baıyz tappadym.Eger álgi qylmystyń beti ashylmasa, tasjúrek áke oıyndaǵysyn odan ári júzege asyryp, búldirshinniń aryn aıaq asty etýdi doǵarmas ta edi.Myna jaryq dúnıege endi ǵana daǵdylanyp kele jatqan bóbek júrekti balǵyn balalyq shaǵynan aıyrdy.

Ortasha esep boıynsha , óńirlerde san myńdaǵan jastar osyndaı qorlyq kóretini anyqtaldy.Al basqa da qylmystardyń betperdesiniń ashylmaǵany qanshama?! Qylmystyq isterdi judyryqtaı jumylyp, quryqqa túsireıik dep ant-sý ishemiz.Áreketke keler bolsaq, mardymdy jumyspen aınalysyp jatqanymyz shamaly...

Kóptegen kóriktilerimiz neshe túrli synaqtardy ótkerip, alaıaqtarǵa aldanǵandaryn alǵa tartady.Iá, senimge syzat túsirip, qyz balasynyń qasyqtap jıǵan abyroıyn shelektep tógetin ekijúzdi azamattarymyzdyń kóbeıýi-kóńildi qulazytady.Shynaıy shattyqqa bólenýdi qalaıtyn arýlarymyzdy qarańǵy túnekke tyǵyp,  muń men sherdiń dámin tatqyzǵan esil erlerdiń áreketterine ne dep jaq ashatynymdy bilmeımin.Opasyzdyq pen satqyndyqtyń sergeldeńine túsip, osy jolda adasyp, jol taba almaı, sanaýly ǵumyrynyń jarty jylyn ótkizgen jannyń erteńgi kúni ne bolmaq? Barshamyzdyń ózegimizdi órteıtin osy bir ókinishti túp tamyrymen joıýdyń jolyn izdestirip baǵýdamyz.Osy máselelerdi týyndatpas úshin rýhanılyqtyń bastaý bulaǵy bolǵan ulttyq qundylyqtarymyzdy dáriptep, qazaqı tálimdi oıatyp, aq kóńilmen ári adal nıetpen barsha álemniń kiltin ustaýǵa tyrysýymyz kerek-ti.Árbir arý óz múddesi úshin kúresýge mindetti.Memleketimizdegi shıelenisken osy bir ahýaldardyń sheshimin taýyp, qıyndyqqa qasqaıyp qarsy tursaq-upaıymyzdyń túgeldenip, asyǵymyzdyń alshysynan túskeni.Názik jandylardyń rýhyn kóterip, muńyn muńdap, altynǵa da aıyrbastamaıtyn aryn saqtasaq-Alash eline aıbyny asqaq keleshek urpaqtyń jerimizdi kórkeıtip, eldigimizdi nyq ustaıtyny anyq.

Arýjan Samıdın

---