InfoHub Logo

30 jáne odan da kóp jyl pedagogıkalyq ótili bar pedagogter ulttyq biliktilik testileýin (UBT) tapsyrýdan bosatylyp, tek qyzmet nátıjesiniń jan-jaqty analıtıkalyq qorytyndysyn, ıaǵnı portfolıony ǵana tapsyrady.

Sondaı-aq eski júıe boıynsha «birinshi», «joǵary» sanattary bar muǵalimder jumys nátıjelerin jan-jaqty qorytyndylaý arqyly «pedagog-moderator» biliktilik sanatyna aýyssa, onda UBT-dan bosatylady.

Sonymen qatar zeınet jasyna shyǵýǵa tórt jyldan aspaıtyn ýaqyt qalǵan muǵalimder attestasıadan bosatylady.

«Oqý-aǵartý mınıstrligi muǵalimderdiń attestasıadan ótý erejesine ózgerister engizdi. Bul rette pedagogterdiń usynystary men tilekteri eskerildi. Mysaly, buryn eńbek ótiline jáne tájirıbesine qaramastan barlyq muǵalim UBT tapsyrsa, endi jekelegen sanattar UBT-dan bosatylady. Bul úlken, 30 jyl pedagogıkalyq ótili bar, zeınetke shyǵýǵa 4 jyl qalǵan muǵalimderge de qatysty. Attestasıa muǵalimderdiń biliktilik deńgeıin anyqtaý maqsatynda ótkiziletinin, onyń nátıjeleri boıynsha olarǵa biliktilik sanattary taǵaıyndalatynyn nemese bekitilgenin jáne jalaqynyń 30-dan 50%-ǵa deıingi mólsherinde aı saıynǵy ústemeaqy tólenetinin atap ótemin», - dedi Oqý-aǵartý mınıstrliginiń orta bilim komıteti tóraǵasy Gúlmıra Karımova.

Attestasıadan ótý kezeńderi de qaıta qaraldy. Birinshi kezeńde muǵalimder bilim berýdi uıymdastyrý barysynda biliktilik baǵalaýdan ótedi.

Odan keıin óz qyzmetiniń nátıjeleriniń jan-jaqty analıtıkalyq qorytyndysyn tapsyrady, ıaǵnı olar portfolıosyn saraptamaǵa usynady.

Kelesi kezeń – ulttyq biliktilik testi.

---