InfoHub Logo

Sabaqtyń taqyryby: Ár túrli materıaldardan parashút, batpyraýyq qurastyrý
Sabaqtyń maqsaty: Parashút, batpyraýyq qurastyryp úıretý. Metal qurastyrǵyshtarmen jumys isteýdi úıretý. Oı - órisin, tanymdyq qabiletin damytý. Shydamdylyqqa, estetıkalyq tárbıesine baýlý.
Bilimdilik: Ushý apparattary týraly túsinikterin keńeıte otyryp, qaǵazdan parashút, batpyraýyq qurastyryp úıretý.
Damytýshylyq: Qolóner túrlerin tereń meńgerte otyryp, úlgi boıynsha jumys isteı bilý. Qabiletterin damytý.
Tárbıelik: Oqýshylardy eptilikke, uqyptylyqqa, eńbeksúıgishtikke tárbıeleý.
Sabaqtyń kórnekiligi: Tústi qaǵaz, jelim, qaıshy, jip, parashút, batpyraýyq sýretteri, daıyn parashút, batpyraýyq, úlgiler.
Sabaqtyń túri: Ashyq sabaq
Ádisi: Suraq - jaýap, áńgimeleý, túsindirý, topqa bólý.
Qajetti qural - jabdyqtar: Qaıshy, qalam, qaǵaz, jip, jabysqaq taspa, jelim
Sabaqtyń barysy:
I. Uıymdastyrý kezeńi.
Amandasý. Oqýshylardy túgeldeý. Sabaqqa daıyndyq.
II. Úı tapsyrmasyn suraý (2 top)
Taqtada sýretter beriledi olardy óz oryndaryn taýyp túsinik berý. Mysaly: (1 sýret «Mozaıka» sol týraly qysqasha túsinik)
1. Sújetti aplıkasıa degenimiz ne? ( Eki nemese odan da kóp zattan jasalǵan aplıkasıany sújetti aplıkasıa dep ataıdy.)
2. Sımmetrıa dep neni aıtamyz?(Bir zatty qaq ortasynan bólip bettestirgende, eki jartysynyń bir - birine dálme - dál kelýin sımmetrıa deıdi. Sımmetrıa tabıǵat syıy)
3. Mozaıka degenimiz ne?(usaq tastardan, mata qaǵaz qıyndylarynan, shyny synyqtarynan quralatyn órnek.)
4. Orıgamı degenimiz.....?(Japon sózi búktelgen qaǵaz degen maǵynany bildiredi.)
5. Tabıǵı materıaldardy ata? (Shóp, japyraq, búr, jańǵaq, qus qaýyrsyny, butaq, kókónis aǵash tuqymdary tabıǵı materıaldar.)
6. Aplıkasıa bul.....? (Negizge qaǵaz, mata qıyqtaryn tabıǵı materıaldardy jelimdeý, tigý, bastyrý.)
Uı tapsyrmasyn qorytý (Suraq - jaýap)
Biz osy ýaqytqa deıin ne úırendik? Neni meńgerdik?
III. Jańa sabaq
Psıhologıalyq daıyndyq.
Kún shýaǵyn sebedi,
Nár alamyn boıyma.
Osy kúnniń jylýyn,
Bereıin dostym boıyńa.
III. Jańa sabaq
Taqyryp ashý (jumbaq)

Jaıyldy kókte qolshatyr
Biraq aspan bári ashyq,
Kókten jerge qalyqtap
Kele jatyr……
Adam balasy erte kezden - aq ushý apparattaryn jasap shyǵarýdy armandaǵan. Alǵashqy ushý quraly áýe shary boldy. 1783 jyly tuńǵysh áýe shary kenepten jáne qaǵazdan jasaldy. Áýe sharynyń, alǵashqy jolaýshylary qoı, úırek, átesh edi. Eki ǵasyr ishinde adamdar ushý apparatynyń alýan túrin jasady. Solardyń biri parashút.
Parashút (fr. parachute, gr. parer – qarsy jáne frans. cute – qulaý) – aýada tejelýge nemese belgili bir jyldamdyqpen baıaýlap tómen túsýge arnalǵan qurylǵy. Parashút jasaýdyń ıdeıasy men onyń ǵylymı negizin 1495 jyly Leonardo da Vınchı usyndy. Adamdarǵa arnalǵan parashútter qutqarǵysh, jattyǵýlyq, sporttyq jáne desanttyq bolyp bólinedi. Negizinen barlyq parashútterdiń qurylymdary birdeı. Parashúttiń negizgi bólikteri: baýlyqtar baılanǵan kúmbez, tartý jáne ilý qurylǵysy, aspaly júıe, arqan oraýysh. Parashút kúmbezi oraýyshqa jınalady, al aspaly júıe parashútke kıiledi nemese tastalatyn júkke bekitiledi.
Parashút kúmbez shatyr men arqannan turady. Kúmbezdiń kómegimen parashút áýede qalyqtaı alady. Arqan ushý kezinde adamdy ustap turady.
Batpyraýyq - balalardyń ózderi jasap alyp, aspanǵa ushyryp oınaıtyn oıyny. Batpyraýyqty qaǵazdan nemese polıetılen materıalynan jasaýǵa bolady.
iV. Saramandyq jumys (2 top)
1 top «2Á» Batpyraýyq
- batpyraýyq jasaıtyn qaǵazdyń ólshemderin 25sm h 25sm sharshy pishinge keltirip daıyndaımyz. Qaǵazdyń buryshtaryn shartty belgimen kórsetemiz.
- sharshy pishindi qaǵazdyń 1 jáne 2 buryshyn dıagonal syzyqpen qosamyz.
- a jáne á buryshtarynyń shetinen 7sm - den belgi salyp belgi ushtaryn bir - birimen qosamyz.
- belgi ushtaryn shartty túrde 3/4 jáne 5/6 dep belgileımiz de 1 buryshynan 4 - belgige jáne 6 – belgige syzyq júrgizemiz.
- batpyraýyqty ushyrýǵa yńǵaılap, ony úshkirleý úshin 1 - 4 jáne 1 - 6 syzyqtyq belgiden qaǵaz jıegin ishke qaraı búkteımiz.
- 3 jáne 5 núktelerine jip baılap ol eki jiptiń ushyn biriktire túıindeımiz. Eki jiptiń qosylǵan túıinine batpyraýyqty aýaǵa ushyratyn uzyndyǵy 10m jińishke ári myqty jipti baılaımyz.
Qaýipsizdik erejesi (Qaıshymen jumys kezinde)
2 top «2A» Parashút
- qalyp úlgi boıynsha parashút kúmbezin jáne parashútshiniń pishinin qıyp al.
- parashút kúmbezin jasaý úshin sharshyny tórtke búkte. Jasalǵan pishindi taǵy ekige búkte. Kórsetilgen syzyqtar boıymen qıyp al. Parashútti jazyp jiber.
- arqandy uzyndyǵy 15 sm jip alyp parashútke joǵarǵy jaǵynan jabysqaq taspamen bekit. Arqandy parashútshiniń pishinine bekit. Sonymen parashútshi ushýǵa daıyn.
Qaýipsizdik erejesi (Qaıshymen jumys kezinde)

V. Sergitý sáti
Al, balalar turyńdar,
Alaqandy uryńdar.
Bir otyryp, bir turyp,
Bir demalyp alyńdar.
Jumbaq sheshý «Kim tapqyr» 2 top arasynda
Qanaty bar, jany joq,
Tabany bar, aıaǵy joq.
Ózi ushady, aspanda júredi,
Teńizden de, taýdan da ótedi.
/ ushaq/
Joq onyń motoryda, qanaty da,
Sonda da ushqyshtardyń sanatynda.
/Parashút/
Pyryldar kókte ınelik,
Inelik emes úı delik
/Tik ushaq/Vertalet/

Qyldyryqtaı bir nárse ıretilgen,
Moınynda uzyn arqan súıretilgen.
/Ine, jip/.

Sandyǵym bar ózgeshe,
Qolyma alyp júremin.
İshin ashyp aqtaryp,
Ómir syryn bilemin.
/Kitap/.
Túsingenderin tekserý.
Parashút, batpyraýyq bólshekterin ata?
Olarǵa tán qasıetti ata?
VI. Qorytyndylaý. Búgingi sabaqta ne jasap úırendik? Senderge unady ma? Óte jaqsy búgingi ashyq sabaqqa 2 topta ıaǵnı 2A jáne 2Á synyp oqýshylary jaqsy qatysty. Jaraısyńdar.
Úıge tapsyrma: Parashút pen batpyraýyqty basqa materıaldan jasap ákelý.
VII. Baǵalaý: 2A jáne 2Á synyp oqýshylarynyń búgingi ashyq sabaqqa qatysyna jáne jasaǵan jumystaryna qarap stıkerler úılestire otyryp baǵalaý. Qatelikterin aıtyp eskertý.

Mańǵystaý oblysy, Qaraqıa aýdany,
Tehnologıa páni muǵalimi: Janabaeva Janyl