InfoHub Logo

Jańa oqý jylynda arnaıy bilim uıymdarynyń jumysyn 9700-den astam pedagog ınternet-platformalardy paıdalana otyryp qashyqtan oqytý formatynda, sondaı-aq shtattyq rejımde jeke jáne toptarda sanıtarlyq qaýipsizdik normalaryn saqtaı otyryp qamtamasyz etedi.

Jańa oqý jyly qarsańynda erekshe bilim berý qajettilikteri bar oqýshylar men ata-analarǵa arnalǵan ádistemelik usynystar daıyndalǵandyǵyn aıta ketken jón. Sondaı-aq Túzetý pedagogıkasynyń ulttyq ǵylymı-praktıkalyq ortalyǵynyń resmı saıtynda erekshe bilim berý qajettilikteri bar balalarǵa arnalǵan oqýlyqtardyń elektrondyq nusqalary men beıne sabaqtar ornalastyrylǵan.

Jalpy elimiz boıynsha 420 arnaıy bilim berý uıymy bar, onyń ishinde 195 psıhologıalyq-pedagogıkalyq túzetý kabıneti, 98 arnaıy mektep, 14 ońaltý ortalyǵy jáne 38 arnaıy mektepke deıingi uıym, 75 psıhologıalyq-medısınalyq-pedagogıkalyq konsýltasıa (PMPK) jumys isteıdi. Psıhologıalyq-pedagogıkalyq túzetý kabınetteri men ońaltý ortalyqtarynda 24 503 bala qoldaý alady, onyń ishinde mektep uıymdaryna barmaıtyn 2415 bala.

Jańa 2020-2021 oqý jylynda tıisti aýmaqtardyń bas memlekettik sanıtarlyq dárigerleriniń kelisimi boıynsha arnaıy bilim berý uıymdaryna qashyqtan, shtattyq, sondaı-aq jabyq rejımde jumys isteýge múmkindik beriledi.

Intellektisi saqtalǵan jáne aqyl-oıy buzylǵan balalarǵa arnalǵan arnaıy mektepterge karantın kezeńinde shtattyq rejım men qashyqtan oqytý formatynan basqa, jabyq rejımdegi oqytý nysany usynylady.

Iaǵnı, oqýshylar men qyzmetkerler mektep-ınternatta turý úshin oqý ornyna bir mezgilde keledi. Arnaıy balabaqshalar jalpy úlgidegi balabaqshalar rejıminde jumys isteıdi.

PMPK, psıhologıalyq-pedagogıkalyq túzetý kabıneti jáne ońaltý ortalyqtary qatań sanıtarlyq-epıdemıologıalyq talaptardy saqtaı otyryp, shtattyq rejımde óz jumystaryn jalǵastyrmaq. Sonymen qatar oqytý arnaıy tehnologıalardy qoldana otyryp, qashyqtan oqytý formatynda da júrgiziletin bolady.

Arnaıy bilim uıymdary oqytý formatyn ata-analarmen kelise otyryp, ózderi tańdaıdy.

---