InfoHub Logo

Ertede bir keıýana bolypty. Ol aıaǵy aýyr áıelderdiń bosanýyna járdemdesedi eken. Áıelder «qoly jeńil» dep, onyń aldyna jıi kelipti.

Bir kúni tún ortasynda esigin bireý qaǵady. Keıýana esikti ashsa, eshkim joq. Kempir «qaǵys estigen shyǵarmyn» dep, qaıta jatady. Osy jaǵdaı eki ret qaıtalanady. Úshinshi ret esikti ashqanda aqboz atty kisini kóredi. Reńi bólek, jergilikti turǵyndarǵa uqsamaıtyn adam eken.

— Bir kelinimiz bosana almaı jatyr, soǵan járdem berseńiz, — deıdi ol.

Kempir kelisip jolǵa shyǵady.

— Apa, kózińizdi tars jumyńyz, biz aıtqansha ashpańyz, áıtpese maıyp bolasyz, — deıdi. Kempir kózin jumyp otyrady. Jolda gúrsildegen, saldyrlaǵan oqys dybystardan qorqyp, záresi ushyp otyrady. Bir jerge jetkende:

— Apa, kózińizdi ashyńyz, — deıdi álgi adam. Qarasa bir úıge kelipti. Tórde bir jas kelinshek bosana almaı qınalyp jatyr eken. Kempir birden iske kirisip aman-esen bosandyryp alady. Náresteniń kindigin kesip:

— Balany shomyldyratyn sý ákelińder, — deıdi. Ózin ertip ákelgen kisi: «Qazir», — deıdi de biraz ýaqyttan soń sý emes sút ákeledi. Balany shomyldyryp qarasa, shara kórshisiniń sút quıatyn ydysyna uqsaıdy eken. Kempir sekem alyp qalady. Basqalarǵa bildirmeı, saqınasyn sútke salyp jiberedi. Bári bitken soń olar balany shomyldyrǵan sút pen ydysty qaıtadan alyp ketedi. Úı ıeleri kempirge mol syılyq berip, úıine ákelip tastaıdy.

Kempir tań ata salysymen sharany tekserý úshin kórshisiniń úıine barady. Álgi ydys kózine ottaı basylady. İshinde sút tur eken. Sútti súzip saqınasyn taýyp alady. Sol kezde túndegi beıtanys adamdardyń jyn ekenin túsinedi.

Kórshisine bolǵan jaǵdaıdy baıandap, sútke jyn balasynyń shomylǵanyn aıtady da, sútti adam aıaǵy baspaıtyn jerge tóktirip tastaıdy.

Kórshiniń kelini burynnan salaq edi. Yrym-tyıym talaptarǵa jeńil qaraıtyn. Maılyqtary, jaýlyqtary aılap-aptalap jýylmaıtyn edi. Keshki astan soń ydystaryn jýýǵa erinip jata salatyn. Úıdegi as-aýqattyń betin búrkep jabýǵa da erinetin. Sol kúni súttiń de betin jappastan jatyp qalypty. Onyń ashyq-shashyq ydystaryn jyn-jypyrlar jalap ketedi eken. Sonyń kesirinen úıiniń berekesi qashyp, otaǵasy eselep mal tapsa da, baqýatty ómir súrmeıtin. Osyǵan baılanysty el ishinde túnge qaraı sút pen sýdy, as-aýqatty ashyq tastamaý, ydys-aıaqty jýyp jatý týraly yrym-talaptar kóbeıgen eken.

---