InfoHub Logo

Árbir jannyń ómirinde ózi tamsana aıtyp otyratyn qyzyq oqıǵasy, ne bolmasa janyńdy jegideı jep muńaıtatyn qaıǵyly oqıǵasy bolady. Barlyǵymyzdyń úıimizdegi úlken ata-ájelerimiz, aǵa-ápkelerimiz ózderiniń balalyq shaǵyn aýzynan sýy quryp áńgimelep otyrady emes pe, qarap tursam, aýylda ósken soń ba meniń de balalyq shaǵym sol kisilerdiń áńgimesine uqsas eken. Bizde asyq oınadyq, láńgi teptik, samaýrynnan sháı iship, aq qara teledıdardan mýltfılm tamashaladyq. Aıtaıyn degenim bul emes, ótken shaqty oılaǵan sátten-aq esime bir oqıǵa túsedi. Bizdiń aýyl óte kishkentaı bolatyn. Kórshi aýyl bolsa óte úlken. Barlyq ortalyqtar sonda ornalasqan, tipten merekelik sharalar da sol jaqta qyzyqtyraq bolatyn. Bir jyly dostarymyzben jınalyp naýryz merekesin sol aýylda toılamaqshy boldyq. Ol aýyl bizden úsh kılometr alshaq jatyr. Eki aýyldy bólip turatyn úlken saı bar. Ol saıdan kóktem aılarynda taýdan erigen qar sýy óte kóp mólsherde aǵyp jatatyn. Sol jyldary ol jerde baılanystyratyn eshqandaı kópir joq bolatyn. Al biz eshnarsege qaramastan merekeni qyzyqtaý úshin úlkenderge aıtpastan jolǵa shyqtyq. Gý-gý áńgime kóńildenip álgi saıǵa kelip tirelgende birden sheshine ketip júzip ótetin jer izdedik. Naýryz aıy biz jaqta ol kezde qar erip jatqan, al sý taý qarynyń erigen óte muzdaı sýy. Sol kúni áıteýir kúnniń ózi salqyn bolatyn. Jastyqtyń oty ma áıteýir sýdyń salqyndyǵyna qaramaı, bir taıazdaý jerge kelip arǵy betke qaramastan, arǵy jaǵaǵa shyǵýǵa tyrasa bastadyq. Bir kezde barlyǵymyz jaǵaǵa shyqtyq. Alaıda ol biz oılanǵan, meje tutqan jaǵa bolmaı shyqty. Sý ortasyndaǵy shaǵyn aral eken. Kishkentaı ǵana saıda osyndaı bolady degen eshqaısysymyzdyń oıymyzda bolmaǵan edi. Sol sátte bir joldasym álgi jerden biz mejelegen jerge sekirip ótýge bolatyndyǵyn aıtyp, ózi sekirip ketti. Onyń aıaqtary uzyn shıraq jigit bolatyn. Dostaramyz kezekpen ótip jatyr, men sońyna qaldym. Endi meniń aldymda boıy kishkentaılaý dosym qaldy. Onyń ótetinine men senimdi edim. Sebebi ol óte shıraq bolatyn. Sekirdi, alaıda aıaǵy jaǵaǵa ilikkenimen ózi artqa qaraı qulap ketti. Tańǵaldym osyndaı kishkentaı saıda osyndaı jáıttar bolǵanyna. Barlyǵymyz álgi dosymyzdy alyp shyqtyq. Onyń ústi sý. Birimizdiń shulyǵymyz sýǵa aǵyp ketken. Birimiz jaýraǵannan qatty dirildeımiz. Ne kerek syrttan qaraǵandaǵy beınemiz jaý qolynan qashyp kele jatqan áskerıler dersiń. Sol aýyldaǵy bir týysymyzdyń úıine baryp jylynyp kıimderdi keptirip, mereke bolatyn alańǵa barsaq, barlyq sharalar bitip qoıǵan eken. Sonymen ne mereke joq, ne kóńil kúı joq, osyndaı bir ystyq estelikti jadymyzǵa túıip aýylymyzǵa qaıtqan bolatynbyz.

Asadbek Ergeshuly

---