InfoHub Logo

Balany ólimnen qutqarǵan qus
Kóleńkede qannen - qapersiz uıyqtap jatqan jeti - segiz jasar balaǵa qaraı aıyr tilin sýmańdatyp ýly jylan jaqyndap keledi. Kútpegen jerden, qaıdan shyǵa kelgeni belgisiz bir qus bala men jylannyń arasyna túsip, kes-kesteı berdi. Jylan da atylýǵa aınalǵandaı shıyrshyq atyp, aıbat shegip, ysqyryp jiberdi. Qus aıaǵyn sanap basyp, jaqyndaı tústi. Bala jaıyna qaldy. Eki túz taǵysynyń adam úshin shaıqasy bastalyp ketti. Jylan shabýyldy údete tústi. Biraq qus ta tez jaltaryp, onyń uly tisin boıyna darytatyn emes. Mine, jalyn taǵy da shap berdi. Qus quıryǵymen jer tirep, jaltara berdi de, jylan basyn qaıtyp tartyp alamyn degenshe, ótkir tumsyǵymen ony tóbesinen shoqyp - shoqyp aldy. Jylan jan saýǵalap, jıyryla keıin shegindi. Biraq ashýly qus shańqyldap, ústi - ústine shoqı berdi, shoqı berdi.
Bala oıanyp ketti. Ol qımylsyz baýyry jaltyraǵan ýly jylandy, onyń janyn aýyr dep alyp jatqan qusty kórip tań qaldy. Munyń ekeýin birdeı kimniń óltirip ketkenin bilmeı, ańyrap jan - jaǵyna qarady. Júregi álsiz ǵana soǵyp jatqan myna kishkene qustyń ózi úshin mert bolǵanyn bala túsinbedi. (Balalarǵa arnalǵan kalendar 1969 j.)