InfoHub Logo

2020 jyldan bastap «Bolashaq» stıpendıasyna arnalǵan kvotanyń barlyq túri alynyp tastalady. Bul týraly búgin Ortalyq komýnıkasıalar qyzmetindegi baspasóz máslıhatynda QR Bilim jáne ǵylym vıse-mınıstri Rústem Bıǵarı aıtty.

«Keshe Shetelde kadr daıyndaý jónindegi respýblıkalyq komısıanyń kezekti otyrysy ótti. Ózderińiz de biletindeı, «Bolashaq« stıpendıasy 26 jyldan astam buryn, 1993 jyldyń 5 qarashasynda bekitilgen bolatyn. Osy ýaqyttyń ishinde 13 myńnan astam stıpendıa taǵaıyndalyp, Qazaqstan ekonomıkasy úshin 10 myńnan astam maman daıyndaldy», - dedi ol.

Vıse-mınıstrdiń aıtýynsha, komısıanyń kesheni otyrysynda 234 jas qazaqstandyqqa magıstratýra men doktoratýrada bilim alý úshin «Bolashaq» stıpendıasy taǵaıyndaldy. Stıpendıanyń 92 paıyzy magıstratýra, 8 paıyzy doktorantýra baǵdarlamasy boıynsha bilim alýǵa berildi. Sonymen qatar, ol QR Memlekettik hatshysy, komıassıa tóraǵasy Qyrymbek Kósherbaevtyń tapsyrmasyna sáıkes, «Bolashaq» baǵdarlamasynyń jańa erejesiniń jobasy engizilgenin atap ótti. Oǵan sáıkes, kelesi jyldan bastap úmitkerlerge jańa talap qoıylady.

Atap aıtqanda, basymdyqqa ıe mamandyqtarǵa basa nazar aýdarylady. Stıpendıaǵa úmitkerler aǵylshyn tiline jetik bolǵandyqtan kelesi jyldan bastap shetelge jibermes buryn tildik daıyndyqtan ótý talaby alynyp tastalady.

«Taǵy bir jańalyq - biz kvotanyń barlyq túrinen bas tartamyz. Qazir memlekettik qyzmetshiler úshin, ınjenerlik-tehnıkalyq mamandyqtar úshin kvota bar. Osy kvotalar joıylady. Bir ǵana jalpy konkýrs jáne maqsatty daıyndyq bolady», - dedi Rústem Bıǵarı.

---