InfoHub Logo

QR BǴM JOO jáne JOO-dan keıingi bilim berý departamentiniń dırektory Serik Ómirbaev pedagogıkalyq mamandyq tańdaǵan abıtýrıent arnaıy emtıhan tapsyratynyn málimdedi, dep habarlaıdy BNews.kz tilshisi.

Bıyldan bastap pedagog mamandyǵyn tańdaǵan talapkerge qoıylatyn talap ta kúsheıdi. Olar JOO túsýdi anyqtaıtyn UBT bólek, taǵy eki emtıhan tapsyrady. Maqsat - JOO tapsyratyn jastardyń pedagogıkalyq qyzmetke beıimdiligi qanshalyqty deńgeıde ekenin anyqtaý.

«Talapkerdiń bilikiligin joǵarǵy oqý oryndarynda ótkiziletin arnaıy emtıhandar arqyly belgileımiz. Bolashaq stýdenttiń pedagogıkalyq kásip tańdaýǵa laıyqty ma, joq pa ony arnaıy tapsyrylatyn tosyn jaǵdaıdan shyǵý joly men psıhologıalyq test arqyly anyqtaımyz», - dedi S. Ómirbaev.

2016 jyldan bastap QR «Bilim týraly» zańynyń 9-bap 26-tarmaǵyna sáıkes pedagogıkalyq jáne ózge de arnaıy nemese shyǵarmashylyq daıyndyqty talap etetin mamandyqtar arnaıy emtıhan tapsyrýǵa mindetti degen ózgeris engizildi.

Emtıhan JOO bazasynan bekitilgen 22 ýnıversıtette ótkizilmek. Olar 14 oblys ortalyqtary jáne Astana, Almaty, Arqalyq, Jezqazǵan, Túrkistan, Semeı qalalary. Arnaıy emtıhan shildeniń 2-14 aralyǵynda júrgiziledi. Al qujat qabyldaý rásimi 20 maýsym – 9 shilde arasynda.

---