InfoHub Logo

Sultan III Mustafa Han Stambulda meshit saldyryp jatqan jyldary sol meshit mańynda turatyn Lalelı Baba degen atpen tanymal áýlıe kisige zıaratqa barady. Birshama suhbattasqannan keıin Lalelı Babaǵa qarap: «Taqsyr, dúnıedegi eń ádemi nárse ne?!» dep suraıdy. Lalelı Baba: «Dúnıedegi eń ádemi nárse – jaqsy iship-jeý jáne ájetińdi jaqsy ketirý» dep jaýap beredi. Patshaǵa bul jaýap unamaǵandyqtan ún qatpastan shyǵyp ketedi. Biraq sol kúnnen bastap ish qatýy syrqatyna shaldyǵady. Qanshama dárigerler shaqyrtsa da nátıje bermeıdi.

Kún ótken saıyn qınalyp ábden ábigerge túsken patshaǵa Lalelı Babanyń jaýaby esine túsip, ony renjitip alǵandyǵyn túsinedi. Dereý Lalelı Babanyń aldyna keledi: «Taqsyr, men qate ettim, keshirim ótinemin» deıdi. Lalelı Baba oǵan meıirimmen qarap: «Seni bul qıyndyqtan qutqarsam, ótemi retinde maǵan ne beresiń?» deıdi. Patsha: «Myna saldyryp jatqan meshitti syıǵa bereıin» degende Lalelı Baba basyn shaıqap «Jetpeıdi» deıdi. Qanshama qazynalardy usynsa da «jetpeıdi» degen jaýap alady. Sońynda «ne qalaısyz?» - dep suraıdy. Lalelı Baba: «Saltanatyńdy (bıligińdi) beresiń» dedi. Patshanyń basqa amaly joq edi. Bul qıyn jaǵdaıynan qutylý úshin «saltanatym sizdiki bolsyn» dedi.

Áýlıe kisi duǵa etip patsha jeńildep aýrýynan aıyqty. Lalelı Baba: «Boldy ma, endi patsha menmin be?» degeninde Mustafa Han: «Iá ata, budan bylaı siz patshasyz» deıdi. Lalelı Baba kúlimdep, basyn shaıqap, «Quny bir ájetke ǵana tatıtyn ol qandaı patshalyq?! Maǵan ondaı arzan patshalyq kerek emes. Bizge meshittiń aty da jetedi» degen eken. Sodan beri bul meshittiń aty «Lalelı Meshiti» dep atalady.

---