InfoHub Logo

Elimizdegi eń shaǵyn mektep Soltústik Qazaqstan oblysyndaǵy Birlik aýylynda ashyldy. Munda nebári bes oqýshy bar dep habarlaıdy KTK.

Bala sanynyń  azdyǵynan úsh jyl boıy jabyq turǵan bilim ordasy bıyldan bastap qaıta jumys istep jatyr. Buǵan osy óńirge Qytaıdan qonys aýdarǵan qandastarymyz sebep bolǵan. Aınaldyrǵan bes shákirt úshin on adam jumys isteıtin mekemeni tilshiler kórip qaıtty.

Aýdan ákiminiń qolynan mektepke kerek-jaraǵyn alyp jatqan Anar otbasymen bıyl kóktemde Qytaıdan kóship kelipti. Ótken oqý jylynyń tórtinshi toqsanyn aýdan ortalyǵynda támamdaǵan. Bıyldan bastap aýylda oqıtyn boldy.

"Men Qytaıda jaqsy oqyǵanmyn. Endi bul jaqta jaqsy oqımyn degen úmittemin. Mektep ashylǵany da jaqsy boldy", - deıdi 3 synyp oqýshysy Anar Ekpin.

Birlik orta mektebi bala sanynyń azdyǵyna baılanysty úsh jyl buryn jabylǵan edi. Endi teriskeıge Qytaı men Taldyqorǵannan kóshken on otbasyndaǵy bes bala onyń qaıta ashylýyna sep bolyp otyr. Qonys aýdarǵandardyń keıbirine bilim oshaǵynan jumys ta tabylypty.

"Osy mektepke meni jumysqa ornalastyrǵaly jatyr. Jáne de zeınetke shyqqansha jasym elýge keldi, shamam jetkenshe osy Birlik aýylyndaǵy mektepte bir kisilik ese qosyp bersem degen maqsat", - deıdi Birlik aýylynyń turǵyny Álen Orazaly.

Birlik mektebindegi bes balaǵa sabaq beretin eki muǵalimniń biri osy mekteptiń túlegi. Bir kezderi oqýshyǵa toly synyptar búginde eles bolyp qaldy deıdi ol.

"11 jyldyq mektep bolatyn biz oqyp ketken kezde. Bunyń aldynda muǵalim men oqýshylar sany kóp edi. Qazir ekeý. Men jáne taǵy sol qazaq tili men ádebıetinen beretin muǵalim. Eki muǵalim", - deıdi ustaz Gúldana Ahmetova.

Eń shaǵyn mektep ǵımaratyn jóndeýge úsh jarym mıllıon teńge jumsalǵan eken. Onyń syrtynda bir jarym mıllıonnyń qazandyǵy bar. Al eki muǵalim men bes balaǵa ot jaǵýshy, eden jýýshy, kúzetshi men meıirbıkeni qosqanda segiz adam qyzmet kórsetpek.

Jergilikti bılik keler jyly bala sany kóbeıedi dep otyr. Óıtkeni ońtústikten osy aýylǵa taǵy on shaqty otbasy kóship keledi dep kútilýde.

---