InfoHub Logo

Abylaı da Eskeldini es tutqan. Birde qalmaq basqynshylary jaýyngerleriniń joıqyndyǵyn, dúbirli ekendigin sezgen Abylaı sarbazdaryna: «Qyspaqqa túskeli turmyz-aý, bas kóterer er azamatty túgel jınańdar. Osy mańda ózi batyr, ózi mergen, aqyly alǵyr, sózge sheshen, elge kósem, uly júz jalaıyrynyń Eskeldi atty azamaty bar. Sol batyrdy aldyryp, bir jasaqqa qolbasshy jasańdar», — dep nusqaý beredi. Eskeldiniń de tepse temir úzetin, aıbyndansa, orda buzatyn kezi eken. Abylaı han qolqa salǵan soń, Eskeldi qaptaǵan jaý jasaǵyna toıtarys berýge birden attanady. Qalmaqtardyń alǵy tobynyń qalyń shebine qyrǵıdaı tıip, bekinisterin talqandap, jeńiske jetedi.

Eskeldi bastaǵan el qorǵaýshylar İle, Baqanas boıynda da jońǵarlardyń joıqyn kúshine qarsy shyǵyp, qaskóılerdi keıin yǵystyryp, eli men jerin azat etken. Qabanbaı batyrdyń jaýynger tobyna qosylyp, jońǵarlardyń esin jıǵyzbaı qatty soqqy berip, shekaradan asyra qýǵan. İle ózeniniń soltústik jaǵalaýy men Balqash kóliniń boıyndaǵy, Tekeli taýy men Qapal qyryndaǵy jońǵar shapqynshylaryn talqandaýda da Eskeldi bastaǵan sarbazdar erligimen tanylǵany este saqtalǵan shejirelerdiń arqaýyna aınalǵan.

 

---