![Germanıadan Qazaqstanǵa gýmanıtarlyq kómek kelip jetti](http://infohub.kz/uploads/thumbnail/20240120071458581_big.jpg)
- 22 tam. 2020 00:00
- 247
Germanıadan Qazaqstanǵa gýmanıtarlyq kómek kelip jetti
Germanıa elinen gýmanıtarlyq kómek keldi. «Vogt Medical» kompanıasy aýrýhanalarǵa qajetti medısınalyq qural-jabdyq jibergen. Shırek ǵasyr buryn ashylǵan iri kásiporynnyń negizin qalaýshy – Mıhael Fogt Ońtústik Qazaqstanda týyp-ósken. Týǵan jerge búıregi burǵan kásipker qysyltaıań kezeńde kómegin usyndy. 1991 jyly ashylǵan kompanıa 2005 jyldan bastap, Qazaqstanmen áriptestik ornatqan. Jalpy, kásiporyn Amerıkadan bastap, álemniń 70 eline ónimin jetkizedi.
MIHAEL FOGT «VOGT MEDICAL» KOMPANIASYNYŃ BAS DIREKTORY:
«Qazirgi tańda Qazaqstanǵa biz shyǵaratyn ónimder óte qajet. Sondyqtan, maǵan osyndaı oı keldi. Densaýlyqsaqtaý mınıstrligi men Germanıanyń Frankfýrt qalasyndaǵy bas konsýldyqtyń kómegimen osy júkti jiberip otyrmyz. Shamamen 80 tekshe metr kóleminde medısınalyq jabdyqtar bar. Ózim Qazaqstanda týǵandyqtan, ol eldiń taǵdyryna alańdaımyn.»
Kompanıa jibergen kómek elordaǵa jetip, ony «SK – Farmasıa» qabyldap aldy. Birrettik medısınalyq qorǵanysh jabdyqtary ınfeksıalyq jáne basqa da aýrýhanalarǵa taratylady.
MEIİRJAN ÁBÝOV, «VOGT MEDICAL» KOMPANIASYNYŃ QAZAQSTANDAǴY ÓKİLİ:
«Shprıstar bar, perchatkalar bar, búkil aýrýhanaǵa kerekti qazirgi ahýalǵa baılanysty kerek zattyń bári ishinde jetkilikti. Bes myń tonna ishindegi medıkamentter.»
Kásiporyn Qazaqstanmen áriptestikti odan ári nyǵaıtýǵa múddeli. Qazir birqatar jańa jobany iske asyryp jatyr. Mysaly, sıfrlyq dıagnostıka salasyna qajetti radıologıalyq rentgen qurylǵylaryn jasaı bastady. Sapa men qaýipsizdikti birinshi kezekke qoıatyn kompanıanyń ónimine suranys joǵary.