InfoHub Logo

Ádebıettik oqý 3 - synyp.
Sabaqtyń taqyryby: Ybyraı Altynsarın. Taza bulaq
Sabaqtyń maqsaty: Oqýshylarǵa Ybyraı Altynsarın ómiri men shyǵarmashylyǵy týraly qysqasha maǵlumat berý, áńgimeniń mazmunyn jan - jaqty ashý.
Mindetteri: 1. Bilimdilik. Y. Altynsarın ómiri men shyǵarmashylyǵyna toqtalý, áńgimeniń taqyryby men ıdeıasyn, mazmunyn meńgertý;
2. Damytýshylyq. Dúnıetanymyn, oılaýyn, ózindik kózqarasyn, tanym prosesterin damytý. Sóz saptaýyn jetildirý;
3. Tárbıelik. Rýhanı tazalyqqa, adamgershilik asyl qasıetterge tárbıeleý.
Sabaqtyń tıpi: jańa bilimdi meńgertý.
Sabaqtyń túri: izdenis sabaǵy
Ádis - tásili: problemalyq izdenis, taldaý, modýldik oqytý tehnologıasy ádisteri, STO ádisteri
Kórnekiligi: slaıd, Y. Altynsarın portreti, perfokarta
Pánaralyq baılanys: ózin - ózi taný

Sabaqtyń barysy.
1. Uıymdastyrý.
Ujymdyq psıhologıalyq is - áreket.
«Tilekter buryshy», munda oqýshylar muǵalimniń baǵyttaýymen búgingi sabaqta bir - birine 1 - 1 sóılemnen tilek aıtady.
2. Jańa sabaqqa daıyndyq kezeńi.
3. Jańa sabaqty aktıvtendirý kezeńi.
Oı qozǵaý.
Oqýshylarǵa Y. Altynsarınniń portretin kórsetip, mynadaı suraqtar qoıamyn.
1. Oqýshylar, bul kimniń portreti?
2. Bul kisi jóninde ne bilemiz?
Maǵynany taný kezeńi.
a) Oqýshylarǵa slaıd arqyly Ybyraı Altynsarın ómiri men shyǵarmashylyǵy týraly maǵlumatty kórsetemin.
Ybyraı Altynsarın 1841 jyly 20 qazanda qazirgi Qostanaı oblysynyń Altynsarın aýdanynda dúnıege kelgen. Ata - anasy jastaı qaıtys bolǵan ol naǵashy atasy Balǵoja bıdiń tárbıesinde bolady. Ol nemeresin 1850 jyly Orynbordaǵy orys - qazaq mektebine beredi. Ony 1857 jyly Ybyraı úzdik bitirip shyǵady da, halyqqa qyzmet etýdi bastaıdy. 1864 jyly alǵash ret Torǵaıda mektep ashady. 1879 jyly Orynborda «Qazaq hrestomatıasy» oqýlyǵyn shyǵardy.

1889 jyly 48 jasynda aýyr naýqastan qaıtys boldy.
Shyǵarmalary:
Óleńderi: «Ózen», «Jaz»
Áńgimeleri: «Asyl shóp», «Qypshaq Seıtqul», «Baı balasy men jarly balasy», «Órmekshi, qumyrsqa, qarlyǵash» t. b.

á) Mátinmen jumys.
Basty problema – áńgimeniń nelikten «Taza bulaq» atalýy?
Áńgimeniń mazmunyn aýyzsha baıandap, túsindirý.
Oqýshylardyń óz betimen jyldam ári mánerlep oqý jumysyn júrgizý.
Sózdik jumysy.
Ǵıbrat alý – úlgi alý.
Toppen jumys.
1 - topqa tapsyrma:
Mátinge jospar qurǵyzý.
1. Bulaq basyndaǵy úsh jolaýshy.
2. Tasqa jazylǵan jazý.
3. Birinshi jolaýshynyń pikiri.
4. Ekinshi jolaýshynyń sózi.
5. Jas jigittiń sózi.
6. Tastaǵy jazýdyń máni.

2 - topqa tapsyrma:
Róldik oıyn.
Áńgimeni rólge bólip oqý.
3 - topqa tapsyrma.
Zertte.
Áńgimeniń taqyryby ne jaıynda?

Joba qorǵaý.
Adam, bulaq sózderine asosıasıa jasaý.
Bulaq -------------- Adam

«Meniń de aıtarym bar»
Oqýshylar, osy mátindegi tasta jazylǵan sózge sen qandaı pikir bildirer ediń? Óz oılaryńdy ortaǵa salyńdar.

Maqal - mátelderdi oqyp, maǵynasyn ashyńdar.
Berilgen maqaldardyń qaısysy mátin taqyrybyna, aıtar oıyna sáıkes keledi?

Jaqsy adam – eldiń yrysy,
Jaqsy sóz – jannyń tynysy.

Jaqsy bolsań, jerdeı bol, bárin shydap kótergen.
Taza bolsań, sýdaı bol, bárin jýyp ketirgen.

Aqyl kópke jetkizer,
Óner kókke jetkizer.

Ómirmen baılanys.
Biz qandaı bolýymyz kerek? Pikir almasý.

Oı - tolǵanys kezeńi.
«Sý – tirshilik kózi» taqyrybynda shaǵyn shyǵarma jazý.
4. Bilimdi bekitý.
«Baqytty sát» oıyny.
1. Ybyraı Altynsarın kim?
2. Ybyraıdyń týǵan jeri?
3. Ol kimniń tárbıesinde boldy?
4. «Taza bulaq» áńgimesiniń taqyryby?
5. Úsh jolaýshy bulaq basynan neni baıqady?
6. Áńgimedegi jolaýshynyń qaısysynyń sózi kóńilge qonymdy?
7. Áńgimeden qandaı oı túıdiń?

5. Úı tapsyrmasy.
Áńgimeni oqyp, mazmundaý.
6. Baǵalaý