InfoHub Logo

- Ákeńniń kishi inisi ol bala saýatty buǵaldir boldy, - deıdi apasy.

- Qaıbir jyly Jambyl jaqqa da baryp qyzmet istep qaıtty. Sonda Jambyldyń jigitteri jaqsy syılaǵan dep otyratyn biletin jurt. Ózi jaqsy bolsa, qaı jerdiń jigitteri de syılaıdy ǵoı. Bári bir qazaqtyń balasy emes pe? Ana úlken ulyna Baıqadam dep at qoısa, sol jambyldyqtardyń qurmetine qoıylǵan esim. Jambyldyń Baıqadam degen jeri bar eken.Osy kúni garmon oınap otyrasyń ǵoı. Ana bólmede garmon oınap otyrasyń. Sony myna bólmede jatyp tyńdap jatamyn oınap otyrǵanyńdy. Sol bala oınaýshy edi garmondy. Ol balanyń ózi minezi tentek boldy. Biraq aǵasyna qarsy bir aýyz sóılemeıtin. Ákeń qyzmetinen kelip, túste demalyp jatady ǵoı. Ol garmonnyń daýsyn jaqtyrtpaıdy. "Áı, qurtshy ana báleni!" Sonda ana bala garmonyn qushaqtaǵan kúıi lyp etip ushyp turady. Dalaǵa shyǵyp, kógal shóptiń ústinde otyryp oınap otyratyn. Sondaı qumar edi garmonǵa.

Birde, ondaı-ondaı bolady ǵoı boıdaq balada, joldastarymen bolǵan ǵoı, urttap kelipti. Ákeń soǵan shartta-shurt ashýlandy. Ol qamshy ustaıdy ǵoı. Soǵystan keıin de qyzmet istegen jigitter qyzmetti atqa minip júrip istegen. Shar etip bilegine jabysasyń ǵoı. Ol áıeldi tyńdaı ma? Sonda deımin-aý, oı qudaı-aı deseıshi, óziniń qysta kıetin qalyń qara tony bar edi. Sol tondy julyp aldy da, ana bala jeńi sholaq kóılekpen júrgen bala ǵoı, arqasyna jaýyp jiberip, tonnyń syrtynan shart-shart etkizip ashýyn shyǵaryp aldy da, qamshysyn laqtyryp jiberdi. Qansha ashý qysyp tursa da, inimniń arqasyn qamshy osyp ketpesin dep jatyr ǵoı. Baýyr ǵoı, qaıtsin endi, birge týǵan.

- Ákem dúnıe salǵan kúni ol kisi kóp jylady ǵoı.

- Oıboı, jylamaı qaıtsin? Baýyr emes pe, bir áke, bir anadan týyp otyrǵan.

- Úlkender qoıǵyza almady. Sosyn urysty. "Aý, sen degen balaly-shaǵaly bolyp otyrǵan jigit emessiń be? Balalardy jylata beresiń ǵoı endi. Sen kishkene óz-ózińe toqtaý salsaıshy, - dedi. Sonda da aýyzǵy bólmedegi eski kereýettiń ústinde otyryp alyp, kópke deıin solqyldap jylap otyrdy.

- Bulardyń kórgen qıyndyqtary esterinde turady ǵoı. Úsheýi birdeı soǵystyń aldynda jetim qalǵan. Úlkeni seniń ákeńdi soǵysqa alyp ketken. Bulardy jetim ósip jetilgen dep aıtatyny sodan jurttyń. Úsheýi de birdeı qyzmetke aıaq iliktirip ketti deıdi. Úsheýi de birdeı dúnıe jınady, úsheýi de birdeı kitap jınady. Ana eki balanyń úıi de kitaptan kórinbeıdi ǵoı osy, barsań. Ana ákeńniń úlken inisi - muǵalim bala qaıbir jyly Almatyda aýrýhanada jatty. Sonda aǵasyna hat jaza beretin. "Úsh úıdiń baldaryn bir bólmege qama, - deıdi. - Qamap ósir". Aǵaıyndy úsh jigittiń baldary bir-birine jat bolyp ketpesin deıdi ǵoı. Sony oılap jatady sonda jatyp. - Sen ákeńniń ólgen kúnin biletin be ediń? Onda degen sen kishkentaı bala emes pe ediń?! - Bilemin.

---