InfoHub Logo

Jáńgirdiń zamanynda bıler bári erigip áńgimelesip otyrǵanda, bireý turyp aıtady:

— Iapyr-aı, jylqyshy tabynda bir qyz bar deıdi, ony óleńmen de, qara sózben de adam jeńe almaıdy, — degende, han:

— Sol sóılesip, jeńip kelýge kim barady, — degende, bireý «men baramyn» dep aıta almaǵan soń, han Balqy bıge:

— Sen bar, — dedi. Balqy:

— Joq, seniń Shombalyń bar ǵoı, sony jiber, — depti. Han:

— Onda Shombaldy basshy qylyp tórt jigit jibereıin, sen sóıleme, tek solardyń ne sóılegenin, qyzdyń olarǵa bergen jaýabyn estip, qaısysy múdirdi sony aıtyp kelersiń, — depti. Balqy men taǵy Shombaldy basshy qylyp alty kisi jiberipti. Bular baryp bir kúnderde qyzdy izdep taýypty. Qyz dalada órmek toqyp otyr eken, kelip at ústinen aman-saýlyq surasqan soń, Shombal turyp qyzǵa aıtypty:

— Biz jolaýshy edik, osy bir araǵa kelgende minetin atymyz mertigip óldi. Jaqsy mal edi, sonyń basyn asyp tastalyq dep, sizden bir qazan suraı kelip otyrmyz, — dedi. Sonda qyz aıtypty:

— Sheshemniń bir qazany bar kúnde pisip, aýzy ashyq, túbi tesik, jeńgemniń bir qazany bar kúnde pisip, túnde túsip turady, ózimniń bir qazanym bar atyńnyń basy túgil, atańnyń basyn asam deseń de, bere almaımyn, — depti. Ana qalǵan tórt jigit te ázildep, bir-bir sóz aıtsa da, qyzdan bári de kerekti sybaǵalaryn ala beripti. Qalǵan bir jigit:

— Qudasha, men bul jigitterden basqamyn, men bir joq joǵaltqan adammyn, bir aq qoltyq qara qasharym joq, kózińizge túspedi me? — depti.

Sonda qyz:

— Men ózim otyrýshy edim isimdi istep,
Kisige sóıles degen úıge tús dep.
Mana men sol qashardy kórip edim,
Tur edi alty buqa artyn ıiskep, —

depti. Bular sóıtip jeńilip hanǵa qaıtyp kelgesin, han:

— Kim jeńdi? — dep surapty. Sonda Balqy:

— Jibergen adamdaryń qyzdan bári de syılyqtaryn jetkizip aldy, tipti, úndemegen meniń de sybaǵamdy berdi, — depti.

Oqýǵa keńes beremiz:

Jylqynyń torysy kóp pe, tóbeli kóp pe? (İ nusqa)

Syrymnyń Nuraly handy shabýy (İİ nusqa)

Baımaǵambet sultan men Syrym batyr

---