Jastyqtyń oty jalyndap,
Jas júrekte janǵan shaq.
Talaptyń aty aryndap,
Ár qıynǵa salǵan shaq.

Ýaıym az, úmit kóp,
Et aýyrmas beınetke.
Búgin-erteń jetem dep,
Kóńilge alǵan dáýletke.

Qaıratpen kirip jalynbaı,
Aqylmen taýyp aılasyn.
"Men qalaıǵa?" salynbaı,
Jyly júzben jaınasyn.

Qaıratqa senip qaqtyqpaı,
Jazasyn taýyp jaýlasar.
Qatynsha tilmen shaptyqpaı,
Maıdanǵa shyqsa jarasar.

Jalyny qaıtar deneniń,
Únemi turmas osy shaq.
Talaıǵy kári dúnıeniń
Bir ketigin ustap baq.

Quıryǵy shaıan, beti adam,
Baıqamaı senbe qurbyǵa!
Jylmańy syrtta, ishi aram,
Kez bolar qaıda sorlyǵa.

Dosyńa dostyq – qaryz is,
Dushpanyńa ádil bol.
Asyǵys túbi – ókinish,
Oılanyp almaq – sabyr sol.

Aq kóńildi jaqsydan
Aıanbaı salys ortaǵa.
Aqyly, ary tapshydan
Qý sózin alma qolqaǵa.

Sum-surqıa, qý zaman
Gúl kóriner jigitke.
Qyzyqty ómir jaınaǵan,
Keýdesi tolyp úmitke.

Bir nárseni unatsa,
Qaıta oılanyp qaramas.
Maqtatyp jurtty shýlatsa,
Qumary sol qyzba bas.

Seniserge kelgende,
Sene berer talǵamaı.
Jurty qurǵyr sengishke
Tura ma qýlyq jalǵamaı?

Ary ketken aldaǵysh,
Meni-aq alda, sókpeıin.
Baly tamǵan jas qamys
Ormasańshy kókteıin!

Seni jaqsy kórmese,
Sener me edi sózińe?
"Iapyrmaı!.." dep terlese,
Ar emes pe ózińe?

---